Kukësi mposht Laçin dhe merr kryesimin

Kukësi rikthehet te fitorja pas barazimit të kontestuar me Tiranën në “Zeqir Ymeri”. Verilindorët kanë mposhtur Laçin me rezultatin e pastër 2-0 duke treguar dhe një herë se janë një potencial i madh për triumfin në fund.

Një takim i nisur vrullshëm nga ana e Laçit por që uli ritmin minutë pas minute. Pak nga pak Kukësi e gjeti veten dhe në minutën e 29-të zhbllokoi takimin. Pas një harkimi nga Karioka dhe një grushtimi jo të duhur nga Alla, përfitoi Dvornekoviç që dërgoi topin në rrjetë

Tentativat e Laçit nuk rrezikojnë portën e Koliçit duke sjellë një qetësi tek ekipi vendas që në minutën e 65-të do të gjente edhe golin e dytë, supergol i Izair Eminit. Sulmuesi tetovar lëshon të djathtën e tij nga jashtë zonës dhe Selmani nuk arrin të devijojë topin i cili kalon poshtë traversës duke u ndalur vetëm në rrjetë, 2-0.

Kjo fitore rikthen serish kuksianët në krye të klasifikimit me 27 pikë, aq sa Skënderbeu pas barazimit në Gjirokastër, por me golavarazh më të mirë. Ndërsa Laçi gjendet në vendin e 7-të me 10 pikë.