Linja e trafikut Shqipëri-Greqi-Holandë, si funksionon banda e drogës

Policia greke ka goditur një linjë ndërkombëtare të trafikut të drogës që niste nga Shqipëria dhe përfundonte në Holandë.

Sipas mediave helene, policia greke ka arrestuar në Athinë një 25-vjeçar grek dhe i ka sekuestruar në makinë 12 pako me 78 kg e 850 gramë marijuanë gjithsej. Kjo sasi është pjesë e një sasie prej 200 kg drogë, që ishte trafikuar nga kufiri shqiptaro-grek në fshatrat kufitare të Janinës.

Ndërsa 120 kg e pjesës tjetër është trafikuar nga 25-vjeçari drejt Holandës për llogari të një grupi kriminal shqiptar më herët.

Sipas autoriteteve greke, droga ka kaluar nga fshatrat e Gjirokastrës për në Janinë. Më pas nga Janina në Athinë dhe pastaj në Holandë në tregun vendas. 120 kg e pjesës tjetër, është trafikuar nga 25-vjeçari drejt një shteti në Europën Perëndimore.

Arrestimi është kryer më 14 nëntor. Për linjën e drogës që nis nga Shqipëria dhe ka si destinacion final Evropën, “Corriere della Sera” ka publikuar një tjetër shkrim investigativ.

“Corriere della Sera” godet sërish me artikullin e dytë në radhë mbi drogën shqiptare që është kthyer në një sëmundje, e cila aktualisht ka infektuar gjithë tregun evropian, me një super prodhim që, sipas prestigjiozes italiane, gjatë vitit të fundit ka sigluar shifra marramendëse.

Ky shkrim i radhës, që është vijim i atij të dy ditëve më parë, hedh dritë mbi një raport sekret të përgatitur nga italianët dhe gjermanët, ku në mënyrë të detajuar specifikohen shifrat rekord që kanë njohur rritje gjatë trevjeçarit të qeverisjes “Rama”, mënyrat e reja të kultivimit që po përdorin trafikantët dhe tregjet ku ajo transportohet pasi ka kaluar të gjitha fazat e tjera në Shqipëri.

“Miliona euro para të pista që qarkullojnë në Evropë falë kanabisit, janë definitivisht në masë të gjerë të kontrolluara nga mafia e pushtetshme shqiptare”, thuhet në shkrim.

“Element tjetër me rëndësi në raport është, pa dyshim, tregu që zotërojnë sot për sot narkotrafikantët e pushtetshëm shqiptarë, të cilët pa kompromise kanë vendosur në diktatin e tyre rrugët e transportit të drogës drejt Italisë, Holandës dhe Gjermanisë, ku shitet sasia më e konsiderueshme e kanabisit të prodhuar në vend”, thuhet më tej.

“Corriere”, duke u bazuar në raportin sekret, shkruan se një sasi e konsiderueshme e drogës transportohet me gomone në Itali, në këmbë ose me makinë në Greqi, nga ku shpërndahet më pas në Holandë, Francë dhe Austri. Pjesa më e madhe nga rrugët malazeze, serbe dhe hungareze transportohet drejt Gjermanisë.

(Gazeta Shqiptare)