Lulzim Basha paralajmëron Edi Ramën: Nuk do të ketë paqe për ty, mjaft sulmove opozitën

Kryetari i Partisë Demokratike Lulzim Basha ka paralajmëruar Kryeministrin Edi Rama që të mos akuzojë Partinë Demokratike për faktin se Brukseli nuk do të hapë këtë vit negociatat me Shqipërinë.

Në një deklaratë për mediat nga selia blu, kreu i demokratëve i është përgjigjur Ramës, i cili gjatë ditës së sotme pranoi se negociatat nuk do të hapen dhe për këtë fajësoi opozitën.

Sipas Bashës, çdo udhëheqës dhe politikan evropian që është takuar me Kryeministrin, i ka thënë Ramës problemet kryesore që mbajnë vendin peng, të cilat janë droga dhe korrupsioni qeveritar.

Kryetari i PD i bëri thirrje kreut të qeverisë shqiptarë që të ndalojë sulmet ndaj deputetëve të caktuarë europianë dhe ndaj opozitës.

“Muri që mban të izoluar Shqipërinë është muri i drogës dhe korrupsionit shqiptar. Janë mungesa e zgjedhjeve të lira dhe të ndershme. Kjo i është e bërë e qartë Edi Ramës nga çdo politikan që ka takuar. Më është bërë e qartë edhe mua si kryetari i opozitës. Ndaj në emër të opozitës kam një thirrje për Edi Ramën: Mjaft më me sulmet e turpshme prej Don Kishoti, mjaft më duke shpallur armik opozitën dhe shumicën e popullit tënd, nuk do ketë kurrë paqe dhe përparim me drogë  e krim. Nuk do ketë paqe as për ty nëse do fshehësh drogën dhe krimin”, u shpreh kryedemokrati.

Lidhur me ligjin e vetingut, Lulzim Basha sfidoi Kryeministrin për të zbatuar me konsensus këtë ligj vetëm sipas Kushtetutës. Në një rast të tillë, tha Basha, Edi Rama të shkarkojë menjëherë nga detyra kryebashkiakun e Kavajës Elvis Rroshi i cili është dënuar nga drejtësia italiane.

“Sa për vetingun i them Edi Ramës jam gati ta bëjmë që tani sipas Kushtetuteës. Kushtetuta thotë ta bëjë Kuvendi, Edi Rama do ta bëjë ai. Edi Rama nuk e do vetingun. Zgjidhja mund të bëhet që tani duke respektuar Kushtetutën. Le të shkarkojë që sot Elvis Roshin i dënuar për përdhunim dhe trafik droge nga autoritetet italiane”, deklaroi Lulzim Basha.

Fjala e plotë e kryetarit të PD Lulzim Basha:

Muri që mban të izoluar Shqipërinë është muri i krimit, i drogës dhe i korrupsionit qeveritar. Eshtë mungesa e zgjedhjeve të lira dhe të ndershme.

Shqetësimi kryesor i liderëve europianë për Shqipërinë është depërtimi i krimit në politikë, droga dhe korrupsioni. Kjo, i është bërë e qartë Edi Ramës nga çdo politikan që ka takuar, pa asnjë përjashtim, më është bërë e qartë edhe mua si kryetar i opozitës.

Shikoni mediat shtetërore italiane, gjermane, zvicerane, austriake, britanike,  për të kuptuar se çfarë e shqetëson realisht Europën.

Ndaj në emër të opozitës kam një thirrje të thjeshtë për Edi Ramën:

Qepe!

Mjaft më me sulmet e turpshme prej Don Kishoti ndaj politikanëve më të lartë nga Amerika në Austri, në Gjermani, në Hollandë, në Greqi e kudo.

Mjaft më, duke shpallur armik opozitën dhe shumicën e popullit tënd!

Nuk do të ketë kurrë paqe dhe përparim për Shqipërinë me drogë, krim dhe kriminelë në politikë.

Nuk do të ketë paqe as për ty nëse vazhdon të fshehësh dhe mbështesësh drogën dhe krimin.

Në lidhje me vetingun i bëj thirrje Edi Ramës që të amendojmë ligjin pa pasur nevojë për vendimin e Gjykatës Kushtetuese. Unë jam gati që tani.

Kushtetuta thotë se vetingun duhet ta bëjë Kuvendi, kurse Edi Rama do që vetingun ta bëjë ai vetë me drejtorët dhe vartësit e tij.

Arsyeja është e qartë. Si do ta mbrojë ndryshe krimin dhe korrupsionin.

Edi Rama nuk do zgjidhje për Vetingun. Ai e ka vetingun pretekst për të mbuluar dështimin e tij. Sepse zgjidhja është e thjeshtë dhe mund të bëhet menjëherë, që sot, që tani, duke respektuar Kushtetutën e votuar me konsensus.

Ai vetë kryeministri, nuk ka nevojë të presë vetingun për të bëjë pjesën e tij. Nëse Edi Rama do vërtet pastrimin e politikës dhe drejtësisë nga krimi dhe korrupsioni, le të shkarkojë që sot Elvis Roshin i dënuar për përdhunim dhe trafik droge nga drejtësia e Italisë dhe e Zvicrës.

Për aq kohë sa Edi Rama mban në politikë Rroshin, Bushin, Prengën, dhe kriminelët e tjerë, përbetimet e tij për drejtësi dhe veting janë përralla.

Unë, Partia Demokratike dhe çdo shqiptar i ndershëm e duam Shqipërinë në Europë. E duam Shqipërinë si gjithë Europa. Pa krim, pa korrupsion dhe me zgjedhje të lira e të ndershme.?