Lumi ua përmbyti banesat, 15 familje në Babrru vijojnë ditën e 5 të grevës së urisë

15 familje që u përmbytën një muaj më parë nga dalja e lumit Tirana kanë 5 ditë që po zhvillojnë një grevë urie në ambientet e palestrës së shkollës Gramoz Palushi, në Babrru.

Në grevë janë futur 31 persona të cilët i kërkojnë qeverisë dhe pushtetit vendor që të zgjidhë sa më shpejt çështjen e strehimit të tyre, pasi rrezikohen të vdesin nga i ftohti dhe nga uria bashkë me fëmijët e vegjël.

Banorët thanë për “News24” se nuk kanë marrë asnjë ndihmë apo sinjal pozitiv nga Bashkia Kamëz, kryeministri Rama apo kryeparlamentari Meta, të cilëve iu janë drejtuar për ndihmë.

I vetmi që i ka vizituar në grevën e urisë ka qenë Avokati i Popullit, Igli Totozani.

Tre javë më parë në palestrën e shkollës “Gramoz Palushi” në Babrru u strehuan afër 35 familje, shtëpitë e të cilëve u përmbytën nga dalja e fundit e lumit Tirana.

Vetë banorët e prekur nga fatkeqësia thonë se e kanë të pamundur të kthehen në shtëpitë e tyre tek bregu i lumit, pasi ato janë bërë të pabanueshme si shkak i daljes së lumit Tirana sa herë që bie shi, ndaj dhe i kërkojnë qeverisë t’iu akordojë kredi të buta për të blerë shtëpi larg lumit.