Lushtaku do një vend titullari: Ja “sms”-ja më e bukur pas golit

I mjaftuan pak minuta në fushë që të shënonte. Dhe me atë gol jo vetëm i dha fitoren Kukësit, po dëshmoi se ai mbetet lojtari që mund të bëjë diferencën. Kushtim Lushtaku e pranon që pas Teutës i është shtuar vetëbesimi, ndërsa thekson se minutat e pakta i ka prej formës fizike.

Në një intervistë të dhënë për “Panorama Sport”, mesfushori 27- vjeçar rrëfen “sms”-në më të bukur pas golit të përmbysjes. Edhe pse e vlerëson Tiranën, ai beson se të shtunën do të vijë fitorja e radhës për verilindorët.

Pas një goli trepikësh, a pretendon një vend titullari Lushtaku?

Ka një arsye se përse unë kam qëndruar në stol. Kam qenë mbrapa me stërvitje, gjithsesi unë i di vlerat e mia dhe ato i kam treguar edhe në shkuarën. Unë jap maksimumin gjithnjë, kjo është detyra ime. Pastaj, sa i përket stolit, nuk besoj se ka lojtar që nuk do të luajë. Gjithsesi, profesori e bën formacionin.

Si ju duket gara, më e fortë këtë vit apo në 2014-2015 kur ju ishit pjesë e Kukësit dhe dolët nënkampion?

Me të vërtetë që sezoni 2014- 2015 ishte një kampionat shumë i fortë, por besoj që dhe sivjet do të jetë luftë e madhe për titullin. Atë sezon fatkeqësisht nuk ia dolëm dot, edhe pse udhëhoqëm në më të shumtën e tij. Por i ka futbolli këto.

Fitorja me Teutën ishte e para në transfertë dhe ju ishit heroi i saj. E prisnit që do ta vulosnit ju atë takim?

Jemi i vetmi ekip pa humbje dhe më në fund arritëm të fitojmë në transfertë. Mua më shumë më pëlqeu mënyra sesi e kthyem ndeshjen në favorin tonë. Treguam karakter, pasi nuk u dorëzuam kurrë. Nuk është hera e parë që unë kam vendosur një ndeshje me golat e mi, por nuk mund të mohoj faktin që jam i lumtur që gjeta rrjetën.

Dashur pa dashur, ai gol më jep më shumë vetëbesim. Gjithsesi, u ndjeva shumë mirë dhe shumë krenar që Kukësi mori tri pikët, pikërisht me golin tim, të cilin unë kisha kohë që e mendoja.

Çfarë komentesh morët pas asaj ndeshjeje?

Kam marrë shumë komente dhe shumë urime, por më pikanti më erdhi nga vëllai im, Ylli Hoxha. Më dërgoi “sms” ku më shkruante: “O hero i Kukësit, ti je heroi i kësaj skuadre”. Përkrahjen e kam gjetur te të gjithë, nga shokët e ekipit, tifozët, por edhe presidenti që më ka besuar shumë. I falënderoj të gjithë dhe u premtoj se do jap akoma dhe më shumë, pasi fanella që mbaj veshur është e rëndësishme për mua.

Jeni në krye, por besoni se mund të ruani këto pozita deri në fund?

Kam besim që po, pasi ne stërvitemi fort çdo ditë. Por, unë them që duhet të qëndrojmë me këmbë në tokë dhe të japim në çdo ndeshje maksimumin. Ndeshja ndaj Teutës ishte një prej tyre, ku nuk e nisëm mirë, por dëshira, forca dhe përqendrimi sollën përmbysjen. Kështu duhet të veprojmë gjithnjë.

A është Kukësi kandidat real për titull?

Derisa po udhëheqim kampionatin, do të thotë që jemi një ekip i mirë, natyrisht duhet shumë punë. Jemi në rrugën e duhur, ndaj objektivi ynë është titulli kampion.

Përpara keni një ndeshje shumë të fortë, atë ndaj një rivali direkt si Tirana…

Kam shumë respekt për Tiranën, i kanë treguar vlerat e tyre gjatë kampionatit, por në Kukës jemi të pamposhtur dhe do dalim me fitore. Jam shumë i sigurt dhe kam shumë besim se do ta fitojmë këtë përballje.

A është kjo një provë e vërtetë për Kukësin?

Skuadra ka treguar karakter në shumë ndeshje këtë sezon, por e rëndësishme është që ta mbajmë ritmin dhe të plotësojmë detyrat që trajneri kërkon. Kemi cilësi dhe forcë grupi, ndaj jam i bindur që do ia dalim me sukses.

Cilat janë planet dhe objektivat e Lushtakut për këtë sezon, por edhe për të ardhmen?

Tani ka ardhur koha të dalim kampionë, ndaj po i marrim ndeshjet një nga një. Synimi im është të përgatitem shumë mirë dhe të jem në 100% gjithnjë. Unë jam gati të ndihmoj skuadrën me lojën time dhe me kontributin tim.