Memushaj: Golin do e ndërroja me 3 pikët, Odo do e falë Manajn

Mesfushori shqiptar i Peskarës, Ledian Memushaj, në deklaratën e tij pas ndeshjes ku shënoi gol ndaj Romës, por ekipi i tij u mposht 3-2, tha se ishte i gatshëm ta falte golin për 3 pikët nga ky takim. Ai gjithashtu komentoi dhe situatën e sulmuesit Rei Manaj i cili është pezulluar nga trajneri Masimo Odo.

“Jam shumë i lumtur për golin, edhe pse do të doja më shumë që të merrnim pikë. Jam i gatshëm që edhe ta ndërroj me tri pikët (qesh…). Na ka munguar fati dhe ndaj Romës ishte tregues i qartë që nuk kemi asgjë më pak se skuadrat e Serisë A. Nuk kam asnjë dedikim të veçantë për këtë gol, përveçse për dy prindërit e mi.

Manaj? Janë gjëra që ndodhin. Për Rein dhe për të gjithë ne duhet të nisë gjithçka nga zero. Odo është trajner që nuk mban mëri dhe Rei Manaj duhet të punojë fort.”

Nota 6.5 – Me golin e shënuar dhe me paraqitjen e zhvilluar, Memushaj është vlerësuar me notën 6.5 nga “Eurosport”. “Rriti performancën e tij me kalimin e minutave dhe shënoi një gol që rihapi takimin. Fshiu një herë e mirë kujtimin e penalltisë që gaboi në ‘Olimpiko’”./panoramasport