Merkel mërzit Ramën: Keni 5 kushte, por do të vëzhgojmë dhe zgjedhjet

Kancelarja e Gjermanisë, Angela Merkel priti këtë të hënë Kryeministrin e Shqipërisë, Edi Rama në një vizitë zyrtare në Berlin. Merkel u shpreh e vetëdijshme për përpjekjet që duhet të bëjë Shqipëria si dhe për mbështetjen e mëtejshme që duhet të japë Gjermania në procesin e integrimit në BE.

Kancelarja gjermane tha se, Shqipëria është një partnere e rëndësishme dhe aleate në NATO. Ajo vlerësoi ndryshimet e bëra në 26 vite që pas rrëzimit të sistemit totalitar, por nga ana tjetër theksoi kushtet që duhen përmbushur për hapjen e negociatave me BE-në.

Sipas, ministrisë së Jashtme gjermane, Gjermania është investitori i gjashtë në Shqipërisë. Investimet vjetore të drejtpërdrejta gjithsesi janë më pak se dyshifrorë.

MERKEL: Kusht janë dhe zgjedhjet

“Republika Federale e Gjermanisë është përpjekur për të mbështetur Shqipërinë vazhdimisht në të kaluarën, si për shembull duke dërguar përfaqësues në misionin evropian ligjor EURALIUS. Ky mision ka dhënë kontribut vendimtar në reformën në drejtësi, që tashmë është bërë realitet.

Tani, sigurisht që ka rëndësi vazhdimi kësaj rruge. Komisioni Evropian ka vënë pesë prioritete. Kjo përfshin, mes të tjerave, zbatimin e reformës në drejtësi. Kjo përfshin, sigurisht, luftën kundër krimit të organizuar dhe korrupsionit.

Në këtë kontekst, duhet të merrni masa të vazhdueshme në këtë drejtim, pasi edhe Komisioni Evropian këtë ka thënë. Sigurisht, që do të shikohen dhe zgjedhjet, Shqipëria do të bashkëpunojë ngushtë me OSBE-në.”