Mimoza Hafizi: Edi Rama fshihet nën strehën së arrogancës së vet, nuk u siguron do punë të rinjve

Deputetja e themeluesja e LIBRA-s, Mimoza Hafizi ka akuzuar kryeministrin Edi Rama se nuk ka siguruar dot punë për të rinjtë edhe pse kanë përfunduar shkollat me rezultate të lart.

Hafizi ka marrë si shembull, vajzën e re që i kërkoi Ramës një vend pune sepse kishte mbaruar shkollën për infermieri, ndërsa kryeministri iu përgjigj në mënyrën e tij të përhershme se nuk ka vende pune për të gjithë.

Ja reagimi i Mimoza Hafizit:

Kryeministri prapë sot u fsheh në strehën e arrogancës së vet kur një vajzë e re i kërkoi llogari se pse nuk arrin të punësohet si infermiere, megjithë rezultatet e larta në studime.

Se kryeministri e ka të vështirë të pohojë që qeveria e tij ka dështuar t’i japë pacientëve infermierin më të mirë, fëmijëve mësuesin më të zot, qytetarëve nëpunësin më të aftë e të përkushtuar.

Administrata dhe shërbimet publike gëlojnë nga paaftësia dhe korrupsioni. Për këtë mund të dëshmojë çdo qytetar. Kjo situatë ka dekurajuar edhe përpjekjet e të rinjve për shkollim serioz.

Arroganca e kryeministrit s’mund ta mbulojë plagën e madhe që Rilindja i shkaktoi administratës dhe shërbimit publik.