Ngacmoi seksualisht fëmijët e tij të mitur, Gjykata e lë në burg Denis Shmillin

Gjykata e Tiranës ka caktuar sot masën e sigurisë “arrest me burg” për Denis Shmillin, ish-ushtar i ISIS-it në Siri, i cili akuzohet se ka kryer veprime të turpshme ndaj fëmijëve të tij dhe për dhunë në familje.

Në seancën e zhvilluar me dyer të mbyllura, Shmilli mohoi kategorikisht akuzat, duke u shprehur para trupit gjykues se e gjithë kjo është një sajesë e ish-bashkëshortes së tij, e cila kërkon që t’i ndalojë takimin me fëmijët.

Shmilli i kërkoi Gjykatës të drejtën për t’u takuar më fëmijët e tij, qëndrim ky i shprehur edhe nga avokati i tij mbrojtës, i cili të pyeten fëmijët në prani të psikologut. Sipas tyre, dëshmia e fëmijëve është e sajuar nga ish-bashkëshortja e Shmillit.

Por sipas prokurorit të çështjes, dëshmitë janë marrë në zbatim të ligjit, duke shtuar se Denis Shmilli akuzohet për dhunë ndaj ish-bashkëshortes dhe vepra të turpshme ndaj fëmijëve të tij. Për këto dyshime, prokurori kërkoi caktimin e masës së sigurisë “Arrest me burg”.

Disa vite më parë, Shmilli është arrestuar për mbajtjen pa leje të eksplozivëve, i denoncuar po nga ish-bashkëshortja.