Nishani refuzon rimandatimin e Gjeneral Bazo në krye të FA: Në 3 vjet, nuk ka raportuar asnjëherë

Presidenti i Republikës Bujar Nishani ka refuzuar që të rimandatojë gjeneral major Jeronim Bazon në krye të Forcave të Armatosura Shqiptare.

Gjeneral Bazos i ka përfunduar mandati 2 javë më parë, por Ministria e Mbrojtjes mendoi ta rikandidonte edhe për një mandat tjetër dhe i dërgoi propozimin Kryeministrit Edi Rama. Kreu i Qeverisë e firmosi dhe ia dërgoi Presidentit Nishani për ta rimandatuar Jeronim Bazon në krye të FA.

Por kreu i Shtetit, njëkohësisht edhe Komandant i Përgjithshëm i Forcave të Armatosura, refuzon ta pranojë Bazon në këtë funksion edhe për njëherë tjetër.

Sipas arsyetimit të Presidentit, shefi i shtabit të FA gjatë 3 viteve nuk ka raportuar asnjëherë tek Komandanti i Përgjithshëm i FA Bujar Nishani, nuk i ka dërguar asnjë informacion dhe nuk ka bërë asnjë konsultim.