Operohet Berisha, do të kthehet vetëm në vitin 2017

Etrit Berisha ka marrë një lajm shumë të keq gjatë ditës së sotme pasi në momentin ndoshta më të mirë të karrierës së tij në nivel klubi, do të jetë i detyruar të ndalet për të paktën dy muaj. Sipas informacioneve të publikuara nga vetë klubi i Atalantës, lojtari ka mbyllur vitin 2016 dhe do të jetë në fushën e lojës në vitin 2017 pasi do t’i nënshtrohet një operacioni.

Në njoftim, klubi saktësoi se në ndeshjen kundër Romës, Berisha ka dëmtuar meniskun e gjurit të djathtë e si pasojë, do të jetë i detyruar të operohet për të shmangur probleme të mëtejshme.

Ndërhyrja kirurgjikale do të kryhet nesër nga kirurgu i njohur Pier Paolo Mariano në klinikën “Villa Steuart” në Romë ku shkojnë të gjithë futbollistët e njohur italianë kur kanë probleme të ngjashme.

Parashikohet që Berisha të qëndrojë pushim të paktën një muaj, për të filluar punën në fushën e lojës vetëm në janar. Gjithsesi, atëherë do të duhet të fillojë përsëri luftën për të rifituar formën dhe një vend në formacion.