Paralajmërimi i Palokës: Në janar protesta pa kthim, çapaçulat e Ramës s’na e mbyllin dot gojën

Një vit më parë, demokratët e përkujtuan 8 dhjetorin me protestë popullore para Kryeministrisë. Një vit më pas nuk ka një vendim për mënyrën se si do të përkujtohet dita simbol e demokracisë, por Edi Paloka di të thotë me siguri se kur do të nisë përballja pa kthim, që synon të rikthejë demokratët në pushtet.

“8 dhejtori lidhet vetëm me ne pavarësisht sharlatanëve që dalin dhe duan të ndryshojnë historinë, për Edi Ramën e kam fjalën, që thotë se në dhjetor dolëm nga Instituti i Arteve të dehur, ndërkohë që Rama vetë ishte në Greqi. Sigurisht si cdo 8 dhjetor ne do e festojmë se si do e vendosim, a do ketë protestë apo përkujtimore, kjo pak rëndsi ka. Nese e keni tek protestat të jeni të bindur se mbase nga fillimi i vitit që vjen do fillojnë për të mos u kthyer më prapa”, paralajmëron Edi Paloka.

Pak muaj nga zgjedhjet parlamentare, dermokratët janë në përmbyllje të një faze të rëndësishme të ristrukturimit të partisë, atë të hapjes.

“Cdo anëtar i PD deri tek deputetët të impenjohet seriozisht për të afruar të gjitha ato rryma, njerëz që sot mendojnë si ne dhe kërkojnë si ne të rrëzojnë një regjim që po e con vendin drejt greminës. Kjo është arsyeja pse thirrja po përforcohet në këto momente dhe nuk është vetëm kjo”, sqaron Paloka.

Nënkryetari demokrat shton se kjo është një thirrje edhe për anëtarët që të shprehin medimin për demrokatizimin e partisë duke lenë të kuptohet se Partia Demokratike nuk i druhet zërave ndryshe brenda vetëvetes.

“Veç thirrjes që i bëhet deputetëve dhe anëtarëve për tu hapur dhe afruar me qytetarët ne kemi kërkuar nga çdo anëtar të japë sugjerime, të ofrojë zgjidhje për probleme të ndryshme dhe të shprehë mendimet, sugjerimet që ata kanë, qoftë për demokratizimin e vetë PD që nesër do përkthehet në demokratizimin e vendit, qoftë në mënyrën si e shohin ecjen e mëtejshme në këtë etapë dhe etapat e metejshme”, thekson nënkryetari demokrat.

Edi Paloka, i cili u ndëshkua pak ditë më parë nga Byroja e Kuvendit, i qëndron idesë për bojkotin e Parlamenti. Por a ka një skenar të opozitës për tu vetëpërjashtuar?

“Ka një skenar dhe ai është skenari i Edi Ramës për t’i mbyllur gojën opozitës. Jo Edi Rama, por askush kur s’na e mbyllën gojen baballaret e tij ca çapacula nuk mund të na e mbyllin gojën”, thotë Paloka. (News24)