Plani për sulm Shkodër, zbulohen të penduarit e grupit të xhihadistëve

Zbulohen emrat e dy personave “të penduar” nga grupi i 22 të dyshuarve për terrorizëm të arrestuar më 4 nëntor 2016, njëherësh në Shqipëri dhe në Kosovë. Siç bëhet me dije, dy personat “e penduar” kanë pranuar të tregojnë detaje në lidhje me planin për sulm gjatë ndeshjes Shqipëri-Izrael në stadiumin e Shkodrës. Sipas burimeve të hetimit, personat e penduar janë shtetasit Visar Ibishi dhe Flamur Gashi. Ata janë mes 18 të arrestuarve gjatë ditëve të fundit për terrorizëm në Kosovë.

Shtetasi Visar Ibishi, sipas hetimeve, ka pranuar se pas komunikimeve të vazhdueshme me Lavdërim Muhaxherin dhe Ridvan Heqimin, kanë marrë urdhrat për sulmin në stadiumin e Shkodrës. Gjatë dëshmisë së tyre, dy të penduarit kanë treguar veprimet konkrete që kanë kryer si në Kosovë e Shqipëri për të realizuar një sulm me eksploziv gjatë ndeshjes Shqipëri-Izrael në Shkodër. Çështja po hetohet nga ana e Prokurorisë së Krimeve të Rënda, pas referimit të dosjes nga SHISH.

Shërbimi Sekret shqiptar u informua nga partnerët rreth një muaj e gjysmë para ndeshjes Shqipëri-Izrael dhe për këtë arsye bashkëpunoi me Prokurorinë në parandalimin e sulmeve të mundshme. Për këtë arsye, në datën 4 nëntor 2016, në Shqipëri dhe në Kosovë njëherësh u arrestuan 22 persona. Dyshohet se sulmi do të kryhej nga shtetas nga Kosova, të cilët do të ndihmoheshin nga afër prej shtetasve nga Shqipëria, edhe për shkak të orientimit gjatë lëvizjeve në terren.

Grupi i Kosovës ka pasur lidhje të ngushta me të arrestuarit në Shqipëri. Njëri prej tyre, Medat Hasani, ish-ushtarak, ka pasur lidhje familjare me shtetasin Besart Peci i arrestuar në Kosovë, i cili është kunati i ish-oficerit të forcave komando. Takimet mes tyre janë fotografuar në Shqipëri e Kosovë. Mes të arrestuarve në Shkodër është edhe Bekim Protopapa, mjek, i cili ka dalë edhe në hetimet ndaj shtetasve Genc Balla dhe Bujar Hysa, imamë të vetëshpallur të dënuar tashmë për rekrutimin e shtetasve shqiptarë në luftën e Sirisë.

Bekim Protopapa rezulton se ka qenë në shtëpinë e Diamant Rashës për ngushëllim pas rënies së tij në luftën e Sirisë. Më 4 nëntor ranë në pranga Bekim Protopapa, Ergys Faslija, Xhezair Fishti dhe Medat Hasani, të cilët mendohet se kishin rol ndihmës në planin për sulme në stadiumin e Shkodrës.