Plani për sulmin ndaj ekipit izraelit, Kongresmeni amerikan: U parandalua masakra

Kongresmeni amerikan Eliot Engel ka përgëzuar autoritetet e Kosovës dhe të Kosovës për parandalimin e sulmit terrorist në Shqipëri ndaj kombëtares së Izraelit.

Përmes një njoftimi për mediat, Engel thotë se ky sulm do të kishte përfunduar më keq se sulmi që iu bë ekipit izraelit në Mynih në vitin 1972.

“Përshëndes autoritetet në Republikën e Kosovës për të parandaluar sulme të planifikuara terroriste nga ekstremistë islamikë, duke parandaluar masakrën e ekipit kombëtar të futbollit të Izraelit. Ky sulm mund të kishte qenë më keq sesa sulmi brutal që iu bë ekipit olimpik izraelit në Mynih në vitin 1972.

U jam mirënjohës gjithashtu autoriteteve në Shqipëri dhe Maqedoni për partneritetin me Kosovën për të parandaluar këtë sulm”, thotë Eliot Engel.

Kongresmeni amerikan thekson gjithashtu edhe punën e policisë së Kosovës që ka bërë në luftën kundër ekstremizmit.

“Kosova ka ndërtuar një rekord fantastik në luftën kundër ekstremizmit të dhunshëm. Askush nuk duhet të dyshojë në angazhimin e udhëheqësve të Prishtinës në përmbushjen e kësaj sfide, dhe Shtetet e Bashkuara janë me fat që kanë një partner si Kosova në këtë aspekt. Është koha të përshpejtohet anëtarësimi i Kosovës në strukturat Euro-Atlantike dhe në BE”, përfundon kongresmeni amerikan, i cili është një mbështetës i shqiptarëve në Kongresin e SHBA.

Para 1 jave, 4 persona u arrestuan në Shkodër dhe Dibër dhe disa të tjerë në Kosovë, të cilët kishin planifikuar sulm terrorist ndaj Kombëtares izraelite të futbollit që do të luante me Shqipërinë. Ka qenë policia e Kosovës sinjalizoi autoritetet në Shqipëri dhe Maqedoni për personat e dyshuar të përfshirë në këtë plan.