Presidenti i Partizanit u vendos futbollistëve ultimatum për titullin

Eliminimi i Partizanit nga Kupa e Shqipërisë ka lënë shije të hidhur në kampin e kuq, kryesisht te presidenti i klubit, Gaz Demi, i cili u largua i mërzitur nga tribuna VIP e stadiumit “Elbasan Arena” pa u dëgjuar vërshëllima përfundimtare e arbitrit Sadiku. Barazimi 1-1 me Besëlidhjen e nxori Partizanin nga Kupa e Shqipërisë dhe këtë disfatë askush nuk e kishte menduar më parë, nisur nga kundërshtari, i cili vinte nga Kategoria e Parë.
Ky dështim e ka detyruar presidentin Demi që gjatë paradites së djeshme të zhvillonte një mbledhje me ekipin dhe stafin. Për vetë rezultatin, analiza e djeshme është shoqëruar me tone të larta dhe kritika. “Dëshpërimit” të presidentit nuk i ka shpëtuar askush, si nga lojtarët, por edhe pjesëtarët e stafit teknik dhe organizativ.

Përveç evidentimit të mangësive të Partizanit ndaj Besëlidhjes, gjatë analizës janë paralajmëruar edhe masa ndëshkuese për të gjithë, masa të cilat pritet që të specifikohen në ditët në vijim. Pas toneve kritike, presidenti ka kërkuar ndryshim të menjëhershëm, gjë e cila duhet filluar nga ndeshja në vijim me Vllazninë.

Duke ditur që një nga objektivat e sezonit, Kupa e Shqipërisë, u iku nga duart që në mes të nëntorit, “ultimatumi” i njëshit të “demave të kuq” është fitimi i titullit kampion. Nëse ekipi nuk reflekton fuqishëm në 8 javët e mbetura të fazës së dytë, nuk përjashtohet mundësia që gjatë merkatos së janarit ndonjëri të bëhet pjesë e “operacionit fshesa”.

Futbollistët e Partizanit, por edhe drejtuesit, e kanë vetë në dorë që të zbusin zemërimin legjitim të presidentit Demi pas eliminimit nga Kupa, ku si fillim kërkohet që të dalin kampion dimri dhe në fund të fitojnë trofeun madhor. Fitimi i titullit kampion është mundësia e vetme që ky Partizan të shpëtojë sezonin, por njëkohësisht është edhe një obligim për t’u realizuar që në fillim të edicionit.

Stafi teknik e kishte vlerësuar në maksimum ndeshjen e kthimit me Besëlidhjen, pasi hodhi në fushë lojtarët që konsiderohen si titullarët bazë. Madje, mungesa e rezultatit bëri që në pjesën e dytë trajneri Starova të sakrifikojë edhe Torasën duke e futur në fushë, ndonëse ditë më parë ishte përgatitur i diferencuar. Përpos angazhimit maksimal dhe sakrificës, lojtarët e Partizanit nuk arritën që të mposhtnin Besëlidhjen, një kundërshtar që konsiderohej më se i kalueshëm.