Rama ju tregon fshatarëve të Peqinit se çfarë pune i ka caktuar Taulant Ballës

Edhe në takimin e sotëm të kryeministrit Rama në Peqin me “fermerët”, ashtu siç bën zakonisht, nuk kishte si të mungonte gallata, “humori i hollë” dhe batutat.

Kështu, një nga “fermerët” kur e pa që kryeministri u mërzit shumë me atë vajzën që i kërkoi llogari se përse nuk gjente dot punë edhe pse ishte profesioniste dhe me shkollë të mbaruar me mesatare të lartë, e mori fjalën, por në vend që të ngrinte ndonjë shqetësim, ai nisi të lavdëronte punët e qeverisë dhe të shefit të saj që ishte aty përballë. Rama duke bërë modestin, ja ka ndërprerë fjalën menjëherë.

“Të keqen vëllai lëri këto fjalime, se ato i mban Taulanti (Balla) në Parlament”, i ka “mbyllur gojën” fermerit të lumtur me punët e qeverisë.

Gjithashtu shkëmbime batutash ka pasur edhe me një grumbullues, i cili i tha se mblidhte limona nga fshatarët, por kishte vështirësi.

“Z. Kryeministër, unë jam grumbullues dhe mbledh limona. Por këta mi sjellin me thasë. Kanë nga dy rrënjë në shtëpi. Njoni m’i solli me çarçaf”, ju ankua ai.

“Duket që qenke me fitim, se je mirë nga humori”, ia ktheu Rama që nuk po kuptonte nëse fermeri po fliste seriozisht, apo po tallej.