Regjistrimi/ Suksese në jetë Ilir Beqja, nesër në Parlament flasim ndryshe

Deputeti demokrat Astrit Patozi reagoi pas publikimit të audio regjistrimit të ministrit të Shëndetësisë, Ilir Beqaj me vartësinë e tij në Tropojë, të cilin e shkarkon nga puna pasi nuk ka shkuar në një mbledhje partie.

“Është luks i madh që dikush nga opozita të merret sot me arsyet e shkarkimit nga detyra të një socialisti nga Tropoja, pasi ky i fundit ka përgjuar telefonatën me ministrin e vet. Aq më tepër, kur në “scoop-in” e transmetuar, çuditërisht, nuk ishte kapërcyer pothuajse aspak etika dhe kodi i mirësjelljes”, shkruan Patozi në faqen e tij zyrtare në Facebook.

“Është luks i madh që ministrin e megaskandaleve të korrupsionit të kësaj qeverie, në këto tre vjet, ta akuzosh sot për shpërdorim detyre, se ka hequr nga puna një militant të partisë së vet, i cili nuk i paska shkuar në mbledhje. Është më shumë se luks, mendoj unë, që këtë qeveri, e cila po i bën gjëmën çdo ditë vendit, gati në çdo aspekt, ta “kryqëzosh” sot për emërime dhe shkarkime politike brenda mazhorancës”,vijon deputeti demokrat.

“Sepse ndoshta mund të jetë rasti i vetëm, kur Ilir Beqja ka bërë një punë si ministër dhe buxhetit të shtetit nuk i kanë fluturuar qindra mijëra apo miliona euro. Saqë më vjen ta përgëzoj, se të paktën për këtë rast nuk kam ndonjë motiv të fortë si deputet i PD për t’u marrë me të. Por po të isha pa punë dhe qejfli përgjimesh, mbase do t’ia vlente vërtetë. Ndaj për këtë rast “suksese në jetë Ilir Beqja! Nesër flasim ndryshe”, mbyll reagimin e tij Patozi, duke paralajmëruar për një seancë të ‘nxehtë’ plenare, gjatë ditës së nesërme.

Image