SHBA paralajmëron Sirinë dhe Rusinë për bombardimet në Alepo

Këshilltarja amerikane për mbrojtjen kombëtare, Susan Rice, dënoi sot bombardimet e tmerrshme që kishin për shënjestër disa spitale në lagjet rebele të qytetit sirian të Alepos, duke paralajmëruar Damaskun dhe Moskën kundër pasojave të veprimeve të tilla.

“SHBA-ja dënon fuqishëm sulmet e tmerrshme kundër instalimeve mjekësore dhe punonjësve humanitarë”, deklaroi Rice.

“Nuk ka falje për këto veprime të tmerrshme”, theksoi ajo, transmeton atsh.

“Regjimi sirian dhe aleatët e tij, me Rusinë në veçanti, janë përgjegjës për pasojat e menjëhershme dhe afatgjatë të veprimeve të tilla”, vazhdoi këshilltarja amerikane për mbrojtjen kombëtare.