Thaçi: Policia e Kosovës parandaloi sulmin terrorist në ndeshjen Shqipëri-Izrael

Presidenti i Kosovës, Hashim Thaçi, ka mirëpritur raportin pozitiv të “Trasparency Internationa” se Policia e Kosovës është forca më profesionale dhe më e besueshme në Kosovë.

“Strukturat e sigurisë së Kosovës, çdo anëtar të Policisë së Kosovës i përgëzoj për këtë përkushtim dhe këtë sukses”, ka shkruar Thaçi në Facebook.

Thaçi punë shembullore të PK-së e ka cilësuar parandalimin e sulmit terrorist i planifikuar për ndeshjen e futbollit mes Shqipërisë dhe Izraelit.

“Ditë më parë, me një punë shembullore, ata parandaluan sulmin terrorist i planifikuar të ndodhte gjatë ndeshjes së futbollit në mes Shqipërisë dhe Izraelit. Ky ishte një rast tjetër i bashkëpunimit shembullor rajonal, të shërbimeve policore dhe të agjencive të inteligjencës, në shkëmbim informacioni dhe në bashkërendim të masave operative.

Ky është një konfirmim tjetër i nivelit të lartë të përgatitjes së strukturave të sigurisë të Republikës së Kosovës për t’u përballur me sfidat e sigurisë që e kërcënojnë Kosovën dhe rajonin.

Kërcënime të tilla, duhet të na bëjnë më të vendosur, edhe më të pa kompromis në luftimin e ekstremizmit dhe të terrorizmit, të çfarëdo lloji”, shkruan ai.