Thikë policit bashkiak brenda oborrit të institucionit, pranga 54-vjeçarit

TIRANE– Një 54-vjeçar nga Tirana është konfliktuar me punonjësit e Policisë Bashkiake dhe ka plagosur njërin prej tyre me thikë. Ngjarja ka ndodhur mbrëmjen e djeshme rreth orës 21:00, brenda oborrit të Policisë Bashkiake në rrugën e Kavajës në kryeqytet.

Menjëherë është Komisariati i Policisë Nr.2 për këtë ngjarje, dhe shërbimet e policisë kanë mundur të neutralizojnë në kohë 54-vjeçarin Bujar Shehu, 54 vjeç, i dënuar më parë për “Kundërshtim të punonjësit që kryen një detyrë shtetërore”.

“Ky shtetas dyshohet të ketë qëlluar disa herë me thikë punonjësin e Policisë Bashkiake, shtetasin D. H., 37 vjeç, duke i shkaktuar dëmtime në trup. Në cilësinë e provës materiale u sekuestrua një thikë me mbishkrimin “LORD Stainless””, thuhet në njoftimin e policisë.

I plagosuri me inicialet D.H u dërgua në spital, ku mësohet se ndodhet jashtë rrezikut për jetën.

Sakaq, materialet në ngarkim të 54-vjeçarin i kaluan Prokurorisë Pranë Gjykatës së Shkallës së Parë Tiranë, për veprat penale “Vrasje e ngelur në tentative” dhe “Prodhimi dhe mbajtja pa leje të armëve të ftohta”.