Tragjedia në Babrru/ Nëna e fëmijës që vdiq: Zjarrfikësja erdhi pas dy orësh

Baraka ku jetonte çifti Hamzai me dy fëmijët e mitur u shkrumbua e gjitha. Prej saj nuk mundi të dalë e gjallë vajza 2 vjeçare.

Zjarri shpërtheu rreth orës 08:00 të mëngjesit ku në barakë qendronin vetëm 2 fëmijët e mitur, vajza dy vjeçe dhe djali 4 vjeç. Babai kishte dalë të mblidhe kanaçe për të siguruar jetesën ndërsa nëna e fëmijëve ishte larguar pak minuta më parë. Ajo ndodhej pak metra larg, në shtëpinë e prindërve të saj.

Ajo u tha gazetarëve se zjarrfikëset kanë mbërritur në fshatin Babrru me dy orë vonesë. Kjo nuk është hera e parë që kjo skuadër shpëtimi nuk gjendet në kohën e duhur në vendin e ngjarjes. Edhe një vit më parë në zonën e Unazës së Re, ku vdiq nga zjarri në banesë një djalë 4 vjeç, zjarrfikësja mbërriti kur gjithçka kishte marrë fund.

Ndërkohë, ende nuk janë përcaktuar shkaqet e zjarrit që përfshiu përnjeherësh kasollen e familjes së varfër të komunitetit Rom. Dyshohet se një rezistencë ka qenë në fillim vatra e zjarrit dhe mandej ka shpërthyer edhe bombula e gazit duke hedhur në erë kasollen dhe duke i marrë jetën vajzës së mitur.

Ndërsa djali vetëm 4 vjeç ka arritur të dalë nga kasollja në momentet e para të zjarrit dhe ka lajmëruar edhe nënën e tij.

Të afërmit tregojnë se çifti jetonte në skamje. Ata kishin ngritur kasollen pranë familjarëve të gruas (dajat e fëmijëve) të cilët i ndihmonin pasi në kasolle nuk kishte as kushtet minimale të jetesës. /Opinion.al