Tritol banesës/ Për ç’e paralajmëruan agjentin e Krimeve të Rinasit?

Zbardhen detaje nga shpërthimi i eksplozivit në banesën e agjentit të Krimeve të Rinasit.

Ngjarja ndodhi rreth orës 02:25, në fshatin Fushë-Prezë të Tiranës, në banesën dykatëshe të efektivit 42- vjeçar Arben Kajmaku. Policia tha se nga shpërthimi nuk ka të lënduar, por vetëm dëme të lehta materiale.

Eksplozivi i llojit tritol, rreth 100 gramë, ka shpërthyer në ballkonin e katit të dytë të shtëpisë së Kajmakut. Nisur nga këto rrethana, burimet thanë se autorët e kanë hedhur atë nga jashtë avllisë dhe qëllimi i tyre nuk ka qenë të shkaktojnë viktima, por një paralajmërim për efektivin.

Kjo, nisur edhe nga fakti se sasia e tritolit nuk ka qenë e madhe, pasi edhe dëmet kanë qenë të lehta. Menjëherë pas shpërthimit ka qenë vetë efektivi që ka lajmëruar kolegët për ngjarjen, duke telefonuar në numrin e emergjencave 112 dhe ka raportuar ngjarjen.

Të parët që kanë shkuar aty kanë qenë efektivët e Komisariatit të Vorës, më pas edhe oficerë të Krimeve të Rënda, ekspertë kriminalistë e antieksplozivë, që kanë bërë këqyrjen e vendit të ngjarjes.

Burimet thanë se lënda plasëse dyshohet të jetë hedhur aty nga jashtë avllisë së shtëpisë, që ndodhet në një distancë të konsiderueshme nga banesa, ndërsa aktivizimi është bërë me fitil zjarrpërcjellës.

HETIMI

Oficerët e Krimeve të Rënda kanë nisur hetimet për zbardhjen e rrethanave dhe motiveve të ngjarjes. Fillimisht është marrë në pyetje efektivi Arben Kajmaku, i cili ka pohuar se nuk ka probleme personale, apo për shkak të detyrës që bën në Komisariatin e Rinasit. Nga ana tjetër, edhe familjarët e tij kanë pohuar të njëjtën gjë, duke mos qenë në gjendje të orientojnë hetuesit drejt ndonjë të dyshuari konkret.

Burimet thanë se, ndonëse nuk ka pohuar të ketë ndonjë problem pronësie, Kajmaku as nuk e ka mohuar që ngjarja mund të ketë lidhje me pronësinë, edhe pse jo drejtpërdrejt me të.

Të njëjtat burime thanë se ngjarja mund të jetë një paralajmërim edhe për të afërmit e efektivit 42-vjeçar, të cilët kanë pasur në vijimësi probleme me pronat që kanë në Fushë–Prezë.

Aktualisht po verifikohen provat e gjetura në vendin e ngjarjes për zbulimin e ndonjë gjurme të autorëve. Deri tani mësohet se janë shoqëruar 8 persona në lidhje me ngjarjen.