Trump përballë Establishmentit shqiptar

NGA KASTRIOT ISLAMIIslami

Zgjedhja e Donald Trump në postin e Presidentit të SHBA-ve e ka çoroditur e tronditur Edi Ramën, sigurisht edhe të gjithë sektin rilindas. Gjatë këtyre ditëve, Rama është shfaqur nervoz, agresiv e depresiv, sepse shikon që as djallëzitë e hilet tipike nuk arrijnë ta nxjerrin nga vorbulla ku është përfshirë. Është në konflikt me të gjithë, jo vetëm për shkak të karakterit të tij por edhe për shkak të “turbulencave” që i ka krijuar përfshirja në fushatën e kandidatit Trump.

Një gazetar, duke iu referuar qëndrimeve të Ramës në marrëdhëniet me jashtë, i kishte krahasuar varavingot e tij me “lëvizjet nga një hu në një hu tjetër”, për të cilën shqiptarët kanë shprehjen e famshme “se po kërceve nga një hu në tjetrin, me siguri do të futet njëri prej tyre…”. Kjo mesa duket ka ndodhur, fatkeqësisht, me Kryeministrin e Shqipërisë, por të shpresojmë vetëm me të dhe jo me Shqipërinë e shqiptarët.

Gjithçka është shprehje e kompleksit të inferioritetit dhe paaftësisë për të qeverisur modestisht vendin më të varfër të Europës por, mbi të gjitha, kjo sjellje tregon qartë delirin e tij për t’u shndërruar në personazh interesant global dhe dëshirën e shfrenuar për pushtet personal. Në thelb, Rama është i shqetësuar se Trump do të ketë në shënjestër çdo establishment që prek interesat amerikane, pra edhe Establishmentin e Korrupsionit, Krimit, Kanabisit që drejtohet në Shqipëri nga Rama dhe që, përmes Ramës, e ka sulmuar atë në fushatë.

1. PËRSE RAMA E KA SULMUAR KAQ FORT KANDIDATIN TRUMP?

Rama ka pasur disa arsye kur ka sulmuar kandidatin për President të SHBA-ve, Donald Trump, sulme që mund të cilësohen të rënda e aspak serioze, të artikuluara nga Kryeministri i një vendi partner strategjik me SHBA:

i) ose sulmet e tij ndaj Trump kanë qenë pjesë e negocimit për të bërë një foto në zyrën ovale me Obamën;

ii) ose këto do të shërbenin për t’u paraqitur te Presidenti Obama si një mbështetës i kandidates Clinton;

iii) ose këto sulme kanë qenë të sugjeruara nga sponsorizuesit e tij;

iv) ose kanë qenë thjesht porosi të këshilltarëve-lobistë;

v) ose sjellja e tij, ndryshe nga çdo drejtues tjetër politik në botë, mund të shpjegohet kryesisht si shprehje e delirit për pushtet personal apo e manisë për t’u evidentuar si “lider global”. Por edhe nëse këshilltarët/lobistët do t’i kishin sugjeruar mbështetjen për kandidaten Clinton, me shumë gjasa, negativiteti dhe sulmi agresiv ndaj Trump-it është tërësisht produkt i delirit dhe i sjelljeve të tij djallë- zore me synim rritjen e mbështetjes për pushtet personal.

2. ÇFARË E KA SHTYRË RAMËN TË SILLET NË KËTË MËNYRË?

Të gjitha arsyet e thëna më sipër e të tjera të papërmendura kanë një emërues të përbashkët: janë shprehje e mediokritetit dhe paaftësisë të lidhura ngushtësisht me delirin dhe ambicien e shfrenuar për të siguruar pushtet personal me çdo mjet e mënyrë.

Argumenti që e përforcon këtë përfundim është përgjigja e pyetjes: Dakord që ai mund të jetë nisur nga ideja apo mund të jetë këshilluar për të mbështetur zonjën Clinton, për të fituar më tej simpatinë e saj, po përse s’është mjaftuar vetëm në mbështetjen për kandidaten demokrate, por ka ofenduar e ka sulmuar agresivisht kandidatin Trump, duke e ditur shumë mirë se po futej në fushatën e shtetit më të fuqishëm të globit, në mënyrë të gabuar a, për të mos thënë, deri të dënueshme?

Kur për më tepër një gjë të tillë e kanë bërë vetëm 3 individë atipikë, Edi Rama-Kryeministër i Shqipërisë, Evo Morales, President i Bolivisë dhe Nikola Maduro-Presidenti i Venezuelës? Dhe për më tepër, Rama ka qenë dhe vazhdon të mbetet konsekuent lidhur me sulmin e shëmtuar ndaj Trump-it, pavarë- sisht piruetave që tenton të bëjë pas zgjedhjes së Trump-it në krye të SHBA-ve.

3. 24 MARS 2016, RAMA: “…ËSHTË TURP PËR SHBA TË ZGJEDHIN TRUMP PRESIDENT…”

Ka qenë 25 marsi 2016, kur për herë të parë Edi Rama vendosi të sulmonte Donald Trump-in. Pak ditë para se të shkonte në SHBA, ku do të pritej në Shtëpinë e Bardhë nga Presidenti Barak Obama, Edi Rama do të shprehej në emisionin “Zululand” të Mustafa Nanos se “është turp për SHBA që të zgjedhin një President si Donald Trump” dhe “nëse Trump zgjidhet President, kjo do të jetë fatkeqësi për Amerikën…”. Ai shton se ‘Trump kërkon të zgjidhet duke ‘blerë’ kapitalet njerëzore…”. Dhe këtë sulm e ka bërë i krekosur si në foton me papagallin.

4. RAMA NË KOSOVË: “…MOS E DASHTË ZOTI QË AMERIKA TA ZGJEDHË TRUMP PËR PRESIDENT…”

Edi Rama ka folur në Prishtinë, në studion e Baton Haxhiut, pas vizitës në Shtëpinë e Bardhë, të cilën është përpjekur ta paraqesë “historike”, duke e cilësuar “shumë emocionuese”. Dhe njëkohësisht ai ka bërë sulme ndaj Trump-it, që patën ngjallur shumë debate. Ai u bë i pari lider europian që e sulmoi egërsisht Trump-in. Rama konkretisht kishte deklaruar: “…se nëse ndodh që Trump të zgjidhet si i pari i SHBA-ve, kjo do të qe fatkeqësi për këtë vend…” por “do të përkeqësoheshin marrëdhëniet diplomatike mes shqiptarëve e amerikanëve. Prandaj mos e dashtë Zoti që Amerika ta zgjedhë Trump për President”. Shumica e perceptuan si peng të budallallëkut apo delirit për pushtet personal…!

5. RAMA NË CNN-SHBA KUNDËR ZGJEDHJES SË TRUMP PRESIDENT…

Rama s’ka folur vetëm në shqip kundër Trump-it, s’ka folur kundër Trump-it vetëm në Tiranë e Prishtinë, por ai ka lëshuar rrufetë edhe në SHBA, në televizionin më të madh CNN, më 14 prill 2016. Duke dëgjuar përgjigjet e tij (https://www.youtube.com/ watch?v=qnv3wqcMjTU) kur thotë se “deklaratat e Trump-it minojnë atë që ne kemi parasysh për SHBA…”.

Rama nuk ndalet në sulmin e tij ndaj Trump-it, ndonëse drejtuesi i emisionit, Richard Quest, i ka kujtuar Ramës “…se etiketa diplomatike do thotë se udhëheqësit e huaj s’komentojnë mbi zgjedhjet në vendet e tjera”. Por Rama guxon të shkojë edhe më larg kur thotë se “…Paqja në Ballkan mund të rrezikohet nga idetë dhe qëndrimet që shfaq Donald Trump…”. 6. Rama, intervistë në revistën “Foreign Policy”: “…Trump e turpëron Amerikën…”

Në një intervistë për revistën “Foreign Policy”, Rama ka thënë se (http:// foreignpolicy.com/2016/04/13/albanianprime-minister-trump-is-the-shame-of-ourcivilization/) “…Trump po e turpëron Amerikën në sytë e botës dhe në sytë e gjithkujt që e sheh Amerikën si qytetin rrezatues mbi kodër”. Rama s’ka hezituar të thotë se “…Trump po shfrytëzon një boshllëk të krijuar nga mungesa e informacionit, nga mungesa e formimit dhe mungesa e kulturës mbi fetë, mbi besimet.” Dhe nuk ka harruar të mburret, duke deklaruar se “…në Shqipëri do të zbatojë në shkolla një program të ri pilot që studentët … të mos simpatizojnë retorikën e Donald Trump-it… si turpin e civilizimit tonë”.

7. RAMA NË NYT: TRUMP KËRCËNIM PËR MARRËDHËNIET SHBA-SHQIPËRI…

Një nga gazetat më të mëdha në SHBA, “New York Times” (NYT), do të shkruante se “një javë para se të vizitojë Uashingtonin, Kryeministri shqiptar, Edi Rama, ka thënë se kandidati republikan, Donald Trump, është një kërcënim për SHBA-të dhe për marrëdhëniet SHBA-Shqipëri”. Madje, Rama s’ka hezituar të analizojë e të japë këshilla edhe për republikanët në SHBA, duke deklaruar se “…s’po flet për republikanët, por për një karakter që ka trullosur disa republikanë aq shumë, sa që tani ata po e shqyrtojnë mundësinë të votojnë për Clinton…”. S’mund të gjendet qëndrim më skandaloz e qesharak.

8.PIRUETAT QESHARAKE TË RAMËS, PAS ZGJEDHJES SË TRUMP PRESIDENT I SHBA…

Më 9 nëntor 2016, në një konferencë për median, ku Edi Rama foli për vendimin e KEsë për hapjen e negociatave me Shqipërinë, ai s’mund t’i shmangej një pyetjeje të bërë me porosi në lidhje me fitoren e Donald Trumpit në SHBA. Në përgjigjen e tij, Rama, i papenduar për “shigjetat” që kishte lëshuar tashmë kundër Trump-it, do të “sqaronte” se “…ishte shprehur në atë mënyrë pas deklaratave të Trump-it kundër Kosovës, emigrantëve, myslimanëve…”.

Por Rama gënjen kur kërkon të gjejë justifikim te deklaratat e Trump-it për “…Kosovën…” sepse ato s’janë të vërteta… Piruetat që përpiqet të bëjë e kanë zhveshur në sytë e publikut çdo ditë e më shumësi burracak e mendjelehtë, duke kujtuar se ato që ka thënë tashmë kundër Trumpit janë harruar apo me mashtrime mund t’i fshijë nga memoria e njerëzve…

9. GAZETA KOSOVARE “EXPRESS” NXJERR BLOF RAMËN…

Gazeta kosovare “Express” ka shkruar (http://www.gazetaexpress.com/lajme/ rama-genjen-trump-nuk-ka-folur-keq-per-kosoven-video-276889/?archive=1): “…Edi Rama gjatë një konference për mediat, sot në Tiranë, ka gënjyer publikun kur ka thënë se deklaratat kundër Trump-it i ka bërë për shkak të Kosovës. S’dihet se cilave deklarata të Trump-it u referohet Rama, por nëse e ka fjalën për ‘intervistën’ që Trump e ka dhënë për një media serbe, ku thuhej se i kishte kërkuar ndjesë popullit serb për Kosovën dhe bombardimet e NATO-s, atëherë dihet se këtë intervistë ekipi i Trump-it e ka mohuar, duke thënë se ai s’ka folur asnjëherë për një media serbe. Gazeta serbe po ashtu kishte kërkuar falje dhe kishte shpjeguar se ata janë viktimë e një aktori serbo-amerikan, i cili kishte fabrikuar intervistën.

10. MESAZHI I URIMIT TË RAMËS ME RASTIN E ZGJEDHJES SË TRUMP NË KRYE TË SHBA…

Urimi i Ramës për zgjedhjen e Donald Trump-it në krye të SHBA-ve nis me një peng për faktin se nuk ishte fituese Hillary Clinton dhe më pas përfundon duke shkruar se “…Donald Trump u zgjodh Presidenti i dyzetepestë i SHBA-ve, duke e bindur sovranin të votojë alternativën e tij, pas një debati të pazakonshëm brenda e jashtë SHBAve. Duke i uruar Presidentit Trump fitoren dhe të gjithë suksesin që amerikanët dhe miqtë e partnerët e SHBA-ve i urojnë atij vendi të madh, kam bindjen se marrëdhënia jonë strategjike me Shtetet e Bashkuara do të vijojë të forcohet në funksion të vlerave e të interesave të përbashkëta, të cilat e bëjnë Shqipërinë një mik e aleat të çmuar të popullit e të qeverisë amerikane….”.

Është po i njëjti individ që disa muaj më parë i ishte drejtuar sovranit, e madje edhe Zotit, që të mos e zgjidhte President të SHBA-ve “turpin e civilizimit” …dhe me guximin e një mashtruesi e frikën e një burracaku, thotë të kundërtën e asaj që ka thënë disa muaj më parë, pasi Trump është zgjedhur Presidenti i SHBA-ve. Hileqar e tinëzar, në vend që të kërkojë ndjesë, vazhdon të deklamojë marrëzitë e tij tipike…

11. RAMA E KONSIDERON TRUMP SI “VËLLAIN E MADH TË OPOZITËS, I SAPODALË NGA BURGU…”

Në seancën parlamentare të datës 10 nëntor 2016, Rama në gjendje të rëndë psikologjike dhe tërësisht jashtë kontrollit mbajti një fjalim me terma ofendues jo vetëm ndaj opozitës por, mbi të gjitha, ndaj Presidentit të sapozgjedhur të SHBA-ve, Donald Trump( https://www.youtube.com/ watch?v=9NRBGA1yNeo) duke e cilësuar atë si “vëllain e madh të opozitës, i sapodalë nga burgu”, që do të rrethohej nga opozitarët, sikur ata të ishin “çunat e lagjes”. Urrejtja dhe frika ndaj Trump-it, mesa duket, tanimë i flasin nga subkoshienca. Dhe kjo duhet përshëndetur, sepse kështu “zullumi këputet duke u trashuar”…

12. RAMA NË EKZIBICIONIN E ZHGARRAVINAVE TË TIJ NË NJU JORK ZVOGËLON FITOREN E TRUMP…

Kryeministri Edi Rama nuk e ka tretur mirë zgjedhjen në krye të SHBA-ve të Doland Trump-it dhe vazhdon të hakmerret ndaj tij. Në ekspozitën e “zhgarravinave” të tij në Nju Jork, të programuar para zgjedhjeve në SHBA për një “foto eventuale” me zonjën Clinton apo diçka më shumë në rastin e zgjedhjes së saj si Presidente, Rama është përpëlitur të relativizojë apo sfumojë fitoren e Trump-it.

Fillimisht duke tentuar të japë mendime për rezultatin jopërfundimtar që favorizonte me votë kombëtare kandidaten Clinton, ose më tej përmes një loje shifrash të tregonte se fitorja e Trumpit s’përbën një ngjarje të veçantë, përderisa ai paska grumbulluar më pak se Obama kur është zgjedhur President(!). Kjo me të drejtë mund të konsiderohet si thellim i marrëzisë.

13. RAMA ËSHTË I TRONDITUR SE E DI QË DO TË LARGOHET NGA PUSHTETI…

Rama është i tronditur se e di që do të largohet nga pushteti. Ai e ka të qartë se regjimi i tij i korruptuar dhe i inkriminuar, së fundmi i përfshirë edhe në kultivimin e trafikimin e drogave, do të çrrënjoset. Kjo do të ndodhte edhe me Hillary Clinton, por pa asnjë dyshim e shumë më shpejt me Trumpin. Rama për më tepër e di që këtë e dinë të gjithë. S’mund të ishte ndryshe fundi i tij.

Por marrëzitë s’kanë të sosur. Në një gjendje të rëndë psikologjike, ai jo vetëm do të reagonte me një fjalim delirant në Kuvendin e Shqipërisë, duke e quajtur Trump-in “vëllai i madh i sapodalë nga burgu” dhe më tej në ekzibicionin në Nju Jork, duke deklaruar se “Trump ka marrë më pak vota se Obama…”.

Ai mesa duket ndjen se është pa mbështetjen e mëparshme, si brenda vendit, ashtu edhe jashtë vendit. Ai e ndjen se ka ardhur momenti i ndëshkimit për mashtrimet e bëra, për korrupsionin e pasuritë e paligjshme të vendosura në llogaritë bankare offshore, për keqqeverisjen që ka shkaktuar kaq shumë varfëri e papunësi, për planet që kishte bërë për të vendosur nën kontroll drejtësinë, për koncesionet korruptive, për jetën luksoze e shëtitjet nëpër botë me paratë e taksapaguesve, për sharjet, ofendimet, kërcënimet ndaj të gjithë kundërshtarëve, e tjerë e tjerë.

Ai ndihet shumë keq se të gjithë e kanë të qartë se ai do të largohet, madje shumë shpejt. Dhe prandaj përpëlitet duke ulëritur, sharë e kërcënuar, por edhe duke u servilosur, lëpirë, jargavitur…

Panorama