Uli Hoeness rikthehet si presidenti i Bayernit

“Ju falënderoj të gjithëve dhe ju premtoj se nuk do t’ju zhgënjej”. Me këto fjalë u është drejtuar Uli Hoeness më shumë se 7000 anëtarëve të asamblesë së klubit, pas rizgjedhjes për herë të dytë si president i Bayern Munchen.

Hoeness, i cili dha dorëheqjen disa vjet më parë kur u dënua për evazion fiskal, mori 98.5% të votave.

Vetëm 108 vetë votuan kundër tij. Pas 30 vitesh si menaxher i përgjithshëm i klubit, ai u zgjodh president në viti 2009.

Ai e la këtë detyrë në mars të 2014 dhe u rikthye me votë, 987 ditë më vonë. I frymëzuar nga 5500 letrat që kish marrë gjatë periudhës së vuajtjes së burgimit Hoenes u kërkoi një mundësi të dytë anëtarëve të asamblesë duke iu premtuar se do të përmbushte detyrat e tij.

“Audi Dome” i Mynihut, ku u organizua asambleja, mund të mbante vetëm 6000 persona, por pjesëmarrja kësaj herë ishte aq e madhe sa klubi ngriti edhe një tendë për anëtarët e tjerë.

Në asamble është folur edhe për ecurinë e ekipit. Shefi ekzekutiv Karl-Heinz Rummenigge, iu drejtua trajnerit Ancelotti duke i thënë se ka gjithë mbështetjen e klubit dhe tifozëve.