Veliaj i del në mbrojtje Nikollës: Respekt për rolin që ajo ka

Gjatë prezantimit të projektbuxhetit në njësinë nr.7, kryetari i Bashkisë së Tiranës, Erion Veliaj shprehu solidarizimin me ministren e Arsimit Lindita Nikolla, pas incidentit të ndodhur ditën e djeshme. Veliaj vlerësoi kontributin që ka dhënë ministrja Nikolla për reformën në sistemin e arsimit.

“Nuk mund të mos përkulem me respekt për rolin që Lindita Nikolla ka pasur dhe ka për transformimin e arsimit. Nuk mund të harroj që në ditët e përmbytjes ishte në Lezhë, ishte në Mirditë, ishte në çdo hidrovor dhe në çdo familje për të çuar ndihma dhe për të ndihmuar këdo që kishte nevojë. Dua t’u kujtoj ish-ministrave te Arsimit që mendojnë se votat vijnë nga histeria e jo nga puna e përditshme, per punen që njerëz si Lindita dhe shumë të tjerë bëjnë. Në fakt në kohën e këtyre ministrave të arsimit, nxënësit ishin mish për top për protesta, regjistrimet e partive bëheshin brenda në klasë dhe qyteti ynë ishte i mbushur me vitrina dhe me kristale, që Lindita i mbylli, dhe që e solli në binar arsimin publik në Republikën e Shqipërisë”, tha Veliaj.

Kreu i Bashkisë u kujtoi të gjithë atyre që shpresat politike i kanë te rikthimi i epokës së gurit, se diskutimet në një botë të civilizuar bëhen si njerëz të civilizuar.

“Epoka e gurit mbaroi se u civilizuan njerëzit dhe e kuptuan që nuk kishe nevojë që të godisje dikë, ta fyeje apo të degjeneroje dikë, por kishte rëndësi që të bënim një debat publik sikurse ky që po bëjmë sot. Ndaj dhe besoj se për të gjithë ata që shpresat e tyre politike i kanë tek rikthimi i epokës së gurit, ju kujtojmë që nuk mbaroi ajo epokë se mbaruan gurët, por mbaruan sepse kombet u civilizuan, dhe në një qytet të civilizuar diskutimet i bëjmë si njerëz të civilizuar”, tha Veliaj.

Kreu i Bashkisë tha se ndryshe nga katër vjet më parë kur ata që protestonin vriteshin në mes të bulevardit, sot problemet diskutohen për të ndërtuar Shqipërinë dhe Tiranën akoma edhe më të fortë.