Veseli: Sevdije Ahmeti do t’i mungojë Kosovës

Edhe kryetari i Kuvendit të Kosovës, Kadri Veseli, është prekur nga vdekja e aktivistes së shquar për të drejtat e njeriut, Sevdije Ahmeti.

Nëpërmjet një mesazhi në faqen e tij zyrtare në Facebook, Veseli ka thënë se vdekja e Ahmetit “është një lajm i dhimbshëm që ka prekur zemrat e të gjithëve”.

“Kontributi i saj i çmuar shumëvjeçar për lirinë e Kosovës, angazhimi i jashtëzakonshëm për mbrojtjen e grave dhe fëmijëve, si dhe dokumentimi që i bëri dhunës së pushtetit serb, do të mbetet pjesë e rëndësishme e historisë sonë”, është shprehur Veseli.

“Një zonjë e guximshme si Sevdije Ahmeti, do t’i mungojë Kosovës”, thuhet në mesazhin e kryekuvendarit. /Express/