VIDEO/ Aksidenti në Lungomare, familjarët fajësojnë shtetin: Vdekshi…

Një dhimbje e papërshkrueshme me fjalë ka kapluar të afërmit e 17-vjeçarit Kristo Panajoti, të riut që humbi jetën në një aksident mbrëmjen e së shtunës në shëtitoren në ndërtim të qytetit të Vlorës.

Këtë të djelë, familjarët kanë përcjellë për në banesën e fundit Kriston, i cili u varros në fshatin Dhërmi prej nga ishte me origjinë familja e tij. Rrugës për në Dhërmi, kortezhi është ndalur në vendin ku Panajoti humbi jetën, në gropën e hapur në mes të rrugës në “Lungomare” pak para se të shkosh tek “Rrapi” siç njihet vendi pranë Ujit të Ftohtë.

Me lot ndër sy, të mbushur me revoltë ndaj shtetit, familjarët kanë qëlluar me gurë në kanalin e hapur që i mori jetën birit të tyre. Ndërsa në një moment dobësie kanë qëlluar me gurë edhe ndaj makinave të firmës që ka marrë përsipër punimet tek “Lungomare”, “XH.E.M” sh.p.k. Duke qetësuar njëri-tjetrin në këtë dhimbje të madhe, të afërmit e Kristo Panajotit kanë vendosur më tej lule në këtë vend, duke vazhduar rrugëtimin e tyre drejt lamtumirës së fundit.

Ata bëjnë përgjegjësi firmën greke që ka fituar tenderin për rregullimin e rrugës, “Intrakt” dhe kërkojnë të vihet drejtësi.

“Vdekshi”, “e provoftë edhe..(përmend një emër që nuk kuptohet qartë nga video), apo “pse na morët djalin në qafë”, ishin thirrjet e familjarëve të Kristi Panajotit, për vdekjen tragjike të të riut.

Familjarët thonë se para gropës së hapur në të dyja korsitë e rrugës, nuk kishte asnjë tabelë që të sinjalizonte për këtë rrezik. Ndërkohë, burime nga Policia e Vlorës thanë për Express se kishte vetëm një tabelë që sinjalizonte për devijim rruge, por duke marrë parasysh rrezikun e jashtëzakonshëm që krijon një gropë e tillë e hapur në të gjithë gjerësinë e rrugës, burimet thanë se duhej të ishin më shumë tabela dhe mbi të gjitha pranë kanalit duhej të kishte bllokuese në rast se ndonjë shofer nuk do të shihte tabelën.

Rreth orës 23:50 makina tip BMw X 6 që drejtohej nga 21-vjeçari Petraq Beja, përfundoi në kanal.