Zaka: ‘Shqiponjat’ më ngritën në ajër dhe më futën në thes, para se të më thyenin dorën

Aktivisti Oltion Zaka është një prej protestuesve të dhunuar dje nga forcat “Shqiponja” gjatë protestës kundër importit të plehrave, në një intervistë për gazetën “Shekulli” ka rrëfyer dhunën që Policia ka ushtruar ndaj tij gjatë protestës si dhe gjatë momenteve të shoqërimit në komisariat.

Teksa mundohet të shpjegojë përplasjen e tij me forcat “Shqiponja”, ai thotë se është trajtuar nga Policia sikur të ishte kriminel dhe një protestues paqësor.

“Kemi qëndruar gjithë natën në rrugë dhe aty nga ora shtatë e mëngjesit kanë ardhur forcat ‘Shqiponja”. Ne ishim të ulur në rrugë dhe Policia kërkoi që të çoheshim, pasi sipas tyre po pengonim njerëzit dhe direkt na kanë kapur dhunshëm.

Unë i thashë që të mos më preknin me dorë, sepse ajo ishte një protestë e ligjshme dhe nuk kishin të drejtë të preknin me dorë, por erdhi si fillim njeri dhe pas tij i dyti, i treti, i katërti dhe më pas nuk kam parë sesa janë bërë më kanë rrethuar dhe siç e keni parë në videon e publikuar më janë sulur disa duke më ngritur në ajër dhe më çuar drejt furgonit. Aty më kanë futur në një thes dhe kur e kam parë veten në Polici.

Gjatë tërheqjes zvarrë më kanë lënduar dorën. Më kanë dërguar në klinikë dhe më thanë se keni lëndime të rënda në dorë. Kam dhimbje dhe në pjesë të tjera të trupit. Me një fjalë më kanë trajtuar sikur të isha kriminel.”