I zbuloi dokumente sekrete shtetërore mikes së saj, Presidentja e Koresë së Jugut gati të japë dorëheqjen

Presidentja e Koresë së Jugut, Park Geun-hye, ka kërkuar nga Parlamenti të gjejë mënyrën ligjore që ajo të japë dorëheqjen. Park u përball me thirrje të shumta për të dhënë dorëheqjen, pas një hetimi se ajo ka lejuar një shoqen e saj që të ndikojë në vendimet e saj politike për përfitime personale.

Ajo ka thënë se do lejojë që Parlamenti të bëjë “çfarë të dojë me të ardhmen e saj, duke përfshirë këtu edhe shkurtimin e mandatit”, por nuk dëshiron që të lërë një vakuum në pushtet.

Parlamenti do diskutojë të premten nëse ajo do të përballet me akuzat.

Zyrtarë të partisë në pushtet janë shprehur se Presidentja duhet të japë dorëheqjen, ndërsa partitë opozitare e akuzojnë atë se po përpiqet që t’i shpëtojë akuzave.

Prokurorët duan të marrin në pyetje presidenten si pjesë e skandalit korruptiv që nisi me zbulimin se ajo i kishte treguar dokumente sekrete shoqes së saj, Choi Soon-sil, e cila më pas shfrytëzoi lidhjet me kreun e shtetit për përfitime personale.

Mjaft zyrtarë të partisë qeverisëse kanë dhënë dorëheqjen për shkak të skandalit, duke lënë vetëm presidenten, e cila deri sot nuk ka dhënë shenja për dorëheqje, pavarësisht protestave masive popullore që kërkojnë dorëheqjen e saj. Të shtunën, rreth 1.5 milionë njerëz protestuan në Seul duke kërkuar largimin e saj nga detyra.