“1500 euro në javë vetëm nga njëra prej vajzave”. Ja sa fitonin në muaj 14 shqiptarët e arrestuar në Milano

“Nëse 1500 euro në javë ju duken pak, atëherë mjafton që këtë shumë ta shumëzoni me 20 vajza që kjo bandë i nxirrte në rrugë për të prostituuar”. Kjo është deklarata e shefit të skuadrës së lëvizshme në Milano, Lorenzo Bucossi, në lidhje me operacionin e koduar “Toka Jonë”, ku 14 shqiptarë janë vënë në pranga për shfrytëzim prostitucioni, shkruan SYRI.net.

E sipas tij, ky është realiteti, lakuriq dhe i dhimbshëm, i dalë pas 1 viti e gjysëm hetimesh të bëra nga policia ndaj organizatës kriminale shqiptare që paratë e nxjerra nga prostitucioni i investonte në trafikun e kokainës.

Sipas Bucossit, banda shqiptare nxirrte në rrugët e Vigevanese, Abbiategrasso, Binasco vajza që vinin nga Moldavia, Ukraina dhe Rumania.

Ai ka treguar se bëhet fjalë për shuma parash që vajzat sillnin 1500 euro në javë, e gati 12 mijë euro në muaj, para që më pas investoheshin në blerjen e kokainës që vinte nga Holanda, bën të ditur SYRI.net.

Policia gjatë këtij operacioni ka sekuestruar një sasi prej 7 kilogramësh kokainë, ndërsa 1.5 kilogramë janë sekuestruar vetëm ditën e djeshme kur është zhvilluar aksioni, drogë e gjetur në disa apartamente në rrugën “Scivia”, të përdorura nga të arrestuarit.

Hetimet nisën pas arrestimit të dy shqiptarëve në mars të vitit 2015, të cilët ishin duke transportuar një sasi prej 5 kilogramësh kokainë

Banda sipas policisë ishte e njohur edhe për dhunën që ushtronte ndaj vajzave që nxirrnin për të prostituuar, ndërsa disa prej shqiptarëve kishin marrë pjesë edhe në një përplasje me armë që kishte ndodhur në zonën e Lorenteggios, shkruan SYRI.net.

Në këtë ngjarje ishin plagosur disa persona, të cilët ndodheshin në një makinë tjetër. Edhe të plagosurit mësohet se ishin shqiptarë dhe ngjarja kishte të bënte me përplasjet për zënien e territorit mes dy organizatave kriminale shqiptare. /SYRI.net