3.4 miliard euro nga taksat e shqiptarëve, 5 miliard nga prodhimi i kanabisit. Me cilin mburret në fakt?

Ndërkohë që në parlament kryeministri Rama dhe ministri i Financave Arben Ahmetaj po mburren me shifrat rekord-historik të buxhetit të vitit që vjen, duke pretenduar se kjo vjen nga lulëzimi i ekonomisë nën qeverisjen e tyre, gjiganti mediatik BBC, zbulon se një tjetër buxhet që e thyen këtë rekord; ai i “qeverisë” së Kanabisit, e cila ka punuar me intensitet gjatë këtij viti.

Por si është situata e këtyre dy buxheteve paralele, në Shqipëri?

Në dokumentarin e realizuar nga gazetarja Linda Pressly, del një shifër e frikshme që ka të bëjë me të ardhurat që krimi i organizuar xhiron me mbjelljen dhe trafikimin e kanabisit vetëm gjatë këtij viti.

“Shqipëria është bërë prodhuesi më i madh i kanabisit të prodhuar në natyrë në Europë. Në një prej vendeve më të varfër në Europë, ku gjysma e popullsisë punon tokën, kanabisi është bërë ari i gjelbër. Një burim përllogarit se ky biznes i paligjshëm mund të ketë një vlerë prej rreth 5 miliardë euro. Rreth gjysma e GDP në Shqipëri”,thuhet në dokumentarin e media prestigjose.

Vetëm pak orë pas publikimit të këtij investigimi, kryeministri Rama dhe ministri Ahmetaj, dalin dhe mburren me buxhetin e tyre.

Sipas tyre në vitin 2017 qeveria planifikon të ketë një buxhet prej 467.2 miliardë lekësh ose rreth 3.4 miliardë euro.

“Me këtë madhësi shpenzimesh që është sa 29.3 për qind e prodhimit kombëtar, qeveria do të jetë gjeneratori më i madh i parave në ekonominë e vendit”, deklaron me krenari Ahmetajn duke e renditur Shqipërinë e Rilindjes si të dytën në Europë mes vendeve ish komuniste, pas Rumanisë.

Pra ja kemi kaluar Polonisë, Hungarisë, Kroacisë, Lituanisë, Letonisë, Sllovenisë, Sllovakisë, Çekisë e me radhë.

Specialistët e ekonomisë e kritikojnë këtë buxhet, pasi ai nuk nxit investimet, të cilat krijojnë edhe vende pune dhe zhvillojnë ekonominë, por po përdoret thjesht për të rritur pensionet dhe pagat e 3 viteve bashkë (Sipas ligjit duhej ta kishin bërë çdo vit) për qëllime elektorale. Por edhe këtu mashtron dhe rritja reale do të shihet kur të filloj 2 muaj përpara zgjedhjeve. Kurse pjesa tjetër e luanit është për zyra e makina për veten dhe klientët e tyre, që do tua shesin apo do fitojnë tenderat e restaurimeve e mobilimeve.

Por Rama duket i qetë, madje edhe i sigurt që me këtë buxhet të Ahmetajt, ekonomia e vendit, do të lulëzojë edhe më shumë dhe mirëqenia e shqiptarëve, e do të ketë rritje të paparë, siç deklaron ministri i Financave.

Por e gjitha kjo e ka një shpjegim. Ka shumë gjasa që gjithë ky delir dhe mburrje, ju vjen pasi live flasin për buxhetin 3.4 miliard që kanë mbledhur nga taksat e rritura për qytetarët dhe në fakt, në mendje kanë dhe bëjnë llogaritë e tyre, me 5 miliardët e buxhetit të kanabisit.