Ahmetaj: PD la një shtet të falimentuar. Buxheti 2017 është për reforma madhore

TIRANE– Ministri i Financave, Arben Ahmetaj u shpreh të enjten në seancë plenare të Kuvendit, se opozita e sotme e la vendin në gjendje të falimentuar ekonomike që mund ta çonin vendin drejt një skenari grek.

“Në 2013 gjetëm një shtet të falimentuar nga disa njerëz, që sot bëjnë kukuvajkën sepse shpresonin se Shqipëria do të përfshihej nga një skenar grek. Kur erdhëm në pushtet gjetëm një borxh publik prej 70.4 për qind, sipas FMN. Defiçiti vjetor, i shpenzuar që në gjysmën e parë të vitit, duke pamundësuar qeverinë e sapo ardhur të financonte veprimet e përditshme. Kjo do të thotë se një qeveri e papërgjegjshme të gjithë shumën e lejuar me ligj të defiçitit buxhetor e kishte harxhuar komplet”, tha Ahmetaj.

Kreu i Financave, theksoi se “nëse qeveria e re nuk do të kishte bërë asgjë, më 23 tetor nuk do të kishte para as për pagat e policisë, shëndetësisë dhe as për pensionet”.

Ahmetaj tha se, “Të njëjtët njerëz që vijnë këtu për herë të tretë në tentativë të dështuar për të rimarrë të drejtën për të falimentuar sërish Shqipërinë e lanë pushtetin me 726 milionë dollarë borxhe nën tryezë. 200 milionë dollarë ishin detyrime të papaguara, 44 milionë dollarë të mohuara ndaj njerëzve me aftësi të kufizuara, 30 milionë dollarë gjoba elektorale, 150 mln euro humbje në vit në sistemin energjitik”.

Ministri i Financave vuri ne dukje se buxheti i ri është buxheti i reformave madhore të Shqipërisë, që ka bërë të mundur kthesën më të madhe në historinë e këtij vendi. “Është buxheti i konsumit të qytetarit”, ka thënë Ahmetaj.

Ministri ka bërë të ditur edhe aspektet pozitive që sjell paketa fiskale.

“Kjo është qeveria e parë që ka vendosur kufirin fiskal, që nuk lejon asnjë qeveri të rrisë borxhin publik. Brenda mandatit të dytë borxhi publik shkon 60 për qind. Nuk do të ketë asnjë taksë për gazin, nuk do të paguani asgjë. Gënjejnë. Vetëm do të disiplinohet shitja e gazit me zero taksë. Reduktimi i akcizës për duhanin e prodhuar në vend me gjysmën e saj. Paketa fiskale është një paketë incentivuese që ul barrën fiskale dhe lehtëson procedurat. Do të rriten pagat dhe pensionet me 100 milionë dollarë, që nuk ka ndodhur asnjëherë”, theksoi Ahmetaj.