Bënte pazar droge me klientin në makinë, kapet në flagrancë shqiptari me 3 doza kokaine

ITALI – Një 38 vjeçar shqiptar ka përfunduar në prangat e policisë italiane për trafik droge. Shqiptari, identiteti i të cilit nuk bëhet i ditur, u arrestua në zonën Mantignana, në periferi të Peruxhias.

Karabinierët bënë një operacion të shpejtë duke e kapur në flagrancë shqiptarin, i cili po mbyllte pazarin me një klient për një doze kokainë. Pasi vunë re makinën që kaloi në kryqëzimin e Mantignana, karabinierët filluan ta ndiqnin, shkruan Ansa.it

Shoferi i makinës, i cili e kuptoi që po ndiqej nga patrulla policore, hodhi nga dritarja diçka që e mbante në xhep. Afër makinës, policia gjeti tre qese me substancë të bardhë, e cila pas analizave doli se ishte kokainë me masë totale 35 gramë. Pas arrestimit në xhepat e shqiptarit u sekuestruan edhe 70 euro.