Beteja në Kuvend për Buxhetin e 2017, Berisha – Ramës: Ti as nuk e di çfarë është GDP-ja e një vendi

Ish-Kryeministri Sali Berisha ka debatuar sot në Kuvend me Kryeministrin për shifrat e projektbuxhetit të vitit 2017, që sipas Ramës ishte ndërtuar duke u bazuar në arritjet e tre viteve të qeverisjes së tij dhe në raportet e organizatave ndërkombëtare.

Por Berisha, që në hapje të fjalës së tij e akuzoi kreun e qeverisë për mashtrim me shifrat që paraqiti, padije në ekonomi dhe injorancë deri në mosnjohjen totale se çfarë ishte GDP-ja.

“Është unike e këtij parlamenti që kthen seancat e viteve të diktaturës, – tha Berisha, – kur ministrat dilnin dhe përsërisnin serialin e mashtrimeve të planeve 5-vjeçare. Nuk mund të flitet për shkallën e papërgjegjshmërisë së dy parafolësve( Ramës e Ahmetajt) por unë do t’ju njoh ju me disa të vërteta që tregojnë shkallën ekstreme të pafytyrësisë të njerëzve që ju mashtrojnë ju nga mëngjesi në darkë.

Të dy parafolësit deklaruan sipas tyre se Banka Botërore konstatonte se varfëria është reduktuar në Shqipëri me 46%.

Varfëria në Shqipëria, njeri në seancën e para një javë dhe tjetri, deklaruan se ishte ulur me 46% sipas tyre, nga deklarata e Bankës Botërore.

A amund të më lejoni mua të tregoj se çfarë thotë ky raport i Bankës Botërore për të treguar shkallën e lartë të pafytyrësisë dhe cinizmit në këtë foltore?! BB thotë se niveli i varfërisë është 47.5%!

Z. Bushati, merre thuaja këtyre injorantëve të mos mashtrojnë në mënyrë të paskrupullt! Në Shqipëri është rritur 47.5%! A ka gjë më cinike, më të pështirë se të tallet me të varfrit dhe ekzistencën e njërëzve?! Kjo ndodh vetëm në diktaturë kur njerëzit lumturoheshin nga varfëria! Kur udhëheqësit u thurnin lavdi, veprës së parafolësve tanë. Po ky është nipi i Spiro Kolekës, xhelatit, i biri i Kristaq Ramës, xhelatit të Havzi Nelës! Po ju jeni organizatë kriminale! Ju silleni si organizatë kriminale!

Nastradini deklaroi këtu se po rrisim rrogat me 100 milionë USD! Pançoja i Nastradinit deklaroi se po e rrisim 7 miliardë lekë! Diferenca është 40 milionë USD! Po kjo s’është gjë!

MOS HAPJA E NEGOCIATAVE, SE RAMA VARROSI KONSENSUSIN

Kalojmë tek negociatat! Shkaku më themelor ta dini ju është varrosja e konsensusit nga Edi Rama.  Marrëdhëniet politike brenda vendit duhet të ishin garancia absolute për hapjen e negociatave. Po pse?

Arsyeja tjetër, jua them unë, është krimi. Është jo një, por disa ministra të Brendshëm të BE që kanë nxjerrë kartonin e kuq. Janë disa vende anëtare të BE që nuk janë dakord dhe janë të lemerisura nga krimi në Shqipëri.

Dijeni mirë se krimi përbën një shqetësim më kryesor se ka të bëjë me sigurinë e tyre. Për njeriun e civilizuar siguria është e para.

Por këta “i hapëm negociatat” thonë. Po a ka pafytyrësi më të madhe se kjo?!

E di ç’bëri Edi Rama! I thirri të gjithë ambasadorët. Shikoni veprimin e tij qesharak. Kishte përgatitur një fletëpalosje dhe i thoshte: “Ja shiko, fotot e Sali Berishës të organizuara nga fotoshopi!”

Nëse ky mendon se me atë fletëpalosje do të hedhë poshtë kanalizimin e vendit, a ka gjë më qesharake?!

Po s’ka gjë më qesharake! Sa shkon në Shqipëri, televizioni kombëtar gjerman: Shqipëria e mbuluar nga kanabisi. Po shiko se çfarë thotë BBC-ja sot?!

Tani thotë se “ngado ku kam shkuar, asnjë s’ma ka përmendur kanabisin!” Po këto televizione, nuk janë damkosja më e madhe e Shqipërisë?!

Mos mendo ti se me kërcënime e gjunjëzon Evropën. Evropa është e paqes dhe sot është më e fortë se kurrë në rrafshin ekonomik, në rrafshin ushtarak. Ka probleme të brendshme, por është e fortë në konjukturë. Ndaj lëri ato dëngla ti të një psikologjie të sëmurë.

U ktheve nga Gjermania ti sikur po ktheheshe nga Kuba. Gjermania është sot një nga vendet e fuqishme ekonomike, politike por dhe në standardet politike. Mendove ti se Angela Merkel mund ta përdorësh për sulme të shplara kundër opozitës?! Po urimet ia ka përcjellë opozitës, nëpërmjet kryetarit të saj, kur zhbllokoi reformën në drejtësi, kurse ty të lanë atje ku ishe.

Të mbetesh të kënaqesh duke mashtruar shqiptarët se Komisioni “nuk vuri asnjë kusht” dhe mbrapa se “negociatat u hapën”! Por jo, duhet dhe një raport tjetër!

Me Ramën kemi mashtrime, integrim nuk ka në mënyrë absolute. Mund të gjsh një eskimez në shkretërtirë, por s’mund të bindësh atë të heqë dorë nga vjedhja e pasurive publike. Mund të shpallësh rrethin në katror, por s’mund të bindësh Edi Ramën të heqë dorë nga krimi dhe lidhjet me krimin. Nuk ka integrim Edi Rama, por vetëm vendnumëro,” nënvizoi Berisha.