Çfarë u vodh në shtëpinë e deputetit të PS?

Persona ende të paidentifikuar i kanë thyer dhe vjedhur shtëpinë deputetit të Partisë Socialiste, Namik Kopliku. Ngjarja dyshohet të ketë ndodhur tri ditë më parë, por është mësuar të martën nga deputeti, i cili nuk ndodhej në banesë kur ndodhi ngjarja.

Burime nga Policia e Tiranës thanë se hajdutët kanë arritur të largohen me disa bizhuteri dhe një sasi parash, pasi kanë kthyer përmbys të gjitha orenditë në apartamentin e Koplikut.

Ndonëse pallati ku banon familja e deputetit të PS-së ndodhet shumë pranë Drejtorisë së Policisë së Tiranës, në rrugën “Myslym Shyri”, efektivët e Policisë deri tani nuk kanë arritur të bien në gjurmët e autorëve.

Kjo edhe për arsye se denoncimi për ngjarjen është bërë thuajse 24 orë pasi kishte ndodhur. Ka qenë vetë deputeti 57-vjeçar ai që ka denoncuar ngjarjen, duke telefonuar Policinë e Tiranës sapo është kthyer nga Shkodra, ku kishte shkuar për festimet e 28-29 Nëntorit.

Ndërsa në vendngjarje, menjëherë pasi kanë marrë njoftimin, kanë shkuar shërbimet e Komisariatit nr.3, që kanë nisur hetimet për zbardhjen e rrethanave dhe identifikimin e autorëve.

NGJARJA

Burime nga Policia e Tiranës thanë dje se vjedhja e banesës së deputetit të Shkodrës, Namik Kopliku, dyshohet të ketë ndodhur gjatë orëve të vona të natës, kohë kur në zonë nuk ka pasur shumë lëvizje.

Ndonëse vjedhja është denoncuar të martën nga deputeti i Partisë Socialiste, Policia ka dyshime se ngjarja mund të ketë ndodhur mbrëmjen e datës 28 nëntor. Ka dyshime se autorët mund të kenë pasur dijeni që asnjë prej familjarëve të Koplikut nuk ndodheshin në banesë dhe për këtë arsye kanë zgjedhur atë moment për të realizuar vjedhjen, raporton “Panorama”.

Pasi kanë thyer derën, duke dëmtuar fishekun e bravës, ata janë futur brenda dhe kanë marrë bizhuteri e para. Mësohet se hajdutët kanë marrë 2 ora dhe 3 varëse floriri, me një vlerë të konsiderueshme.

Por nuk janë mjaftuar me kaq, pasi kanë kontrolluar në të gjithë shtëpinë për të gjetur edhe para. Megjithatë, deputeti në kallëzimin e tij është shprehur se nuk mbante shuma të mëdha parash në shtëpi, vetëm ato që përdorte për nevojat e përditshme. Sipas tij, aq para sa kanë gjetur, hajdutët i kanë marrë bashkë me bizhuteritë dhe janë larguar.

HETIMI

Nisur nga fakti që deputeti dhe familja e tij nuk ndodhej në Tiranë natën kur ndodhi vjedhja e shtëpisë së tij, Policia ka dyshime se autorët mund të kenë pasur dijeni për lëvizjet e tij. Madje mund të jetë edhe ndonjë banor i lagjes që ka shfrytëzuar momentin kur shtëpia ka qenë bosh, për të realizuar vjedhjen.

Policia ka fiksuar disa gjurmë gishtash në derën e jashtme të apartamentit, të cilat po verifikohen nëse u përkasin autorëve apo jo. Ndërsa janë sekuestruar edhe kamerat e sigurisë të disa bizneseve private pranë pallatit ku banon familja Kopliku, në rrugën “Myslym Shyri”, të cilat po verifikohen për të ndihmuar në identifikimin e autorëve.

Policia tha se janë marrë në pyetje edhe fqinjët e deputetit socialist, të cilët kanë parë derën e hapur të apartamentit dhe i kanë telefonuar Koplikut, duke i thënë se dikush i ishte futur në banesë.

Kopliku: E kishin kthyer shtëpinë përmbys, brava e derës ishte thyer

Deputeti i Partisë Socialiste ka treguar se në momentin që hajdutët i kanë thyer derën e apartamentit dhe kanë hyrë për të vjedhur, ai nuk ndodhej në Tiranë, pasi kishte ikur familjarisht në Shkodër për festimet e 28-29 Nëntorit.

Ndërsa është shprehur se kanë qenë fqinjët që e kanë lajmëruar për diçka të dyshimtë në shtëpinë e tij, pasi kishin parë derën të hapur. Në një prononcim për “News 24”, deputeti i Shkodrës ka thënë se autorët kanë marrë në shtëpinë e tij disa bizhuteri dhe një sasi parash, pasi i kishin kthyer përmbys gjithçka.

“Gjatë momentit të grabitjes, banesa ka qenë e mbyllur, sepse unë me gjithë bashkëshorten ishim në Shkodër për aktivitetet e organizuara me rastin e 28- 29 Nëntorit. U shqetësuam normalisht edhe unë, edhe gruaja. Kur shkuam në banesë, gjetëm fishekun e bravës së derës të prishur dhe derën e hapur. Kishin marrë sende me vlerë, bizhuteri. Në ambient kishin bërë rrëmujë, e kishin kthyer përmbys në kërkim të gjërave me vlerë dhe parave ndoshta”, është shprehur deputeti Namik Kopliku.

Ai tregoi se menjëherë ka bërë kallëzimin në Polici për ngjarjen, duke dhënë edhe të dhënat për gjërat që mungonin në banesë.

“Denoncova në polici dhe jam në pritje të vënies së autorëve para drejtësisë. Përveç bizhuterive e sendeve me vlerë, kanë vjedhur edhe një sasi parash, lekë të përdorimit të përditshëm. Grabitja mund të ketë ndodhur edhe 2 ditë më parë, por fqinjët më kanë njoftuar dje (të martën) sapo kanë vë re diçka të dyshimtë”, tha deputeti Kopliku.

PANORAMA