Derbi i Errësirës!

Nga Dritan LACI

Ka përfunduar në shifrat e barabarta 0-0 derbi i shumëpritur i kryeqytetit Tirana-Partizani. Një derbi që përpos pritshmërisë së lartë, rivalitetit historik midis dy ekipeve, spektaklit që nis në rrugët e qytetit disa orë përpara ndeshjes midis dy tifozerive, ngjyrave, koreografive respektive, sharjet që tifozeritë i dhurojnë njëri-tjetrit në shkallët e stadiumit, retorikës politike që sjell gjithmonë fund i këtij derbi, na dhuroi dje mbrëma edhe një moment aspak të këndshëm, atë të fikjes së impiantit ndriçues të stadiumit dhe për pasojë pezullimin e derbit dhe luajtjen e pjesës së mbetur së lojës gjatë ditës së sotme. Sigurisht ajo që ndodhi mbrëmë në stadiumin “Selman Stërmasi” ka ndodhur edhe në impiante të tjera më modern. Kujtoj këtu një ndeshje të ndërprerë disa kohë më parë të Real Madridit në fushë kundërshtare në kampionatin spanjoll.

Gjithkush me këtë justifikim mund tja hedhë lumit pa u lagur dhe të thotë u ndodh skuadrave më të mëdha pse të mos edhe ne. Në fakt problemi nuk është kaq i thjeshtëzuar në atë që tani e tutje do të njihet si “Derbi i Errësirës”. Problemet janë ca më të thella dhe duhet tit hemi ashtu siç janë. Dhe ato kanë të bëjnë direkt me organizimin e ndeshjes. Po flasim për një Derbi. Po flasim për një qytet si Tirana me pothuaj 1 milion 200 mijë banorë. Nëse do ishte problem teknik thjesht i impiantit këtu mund të kishim një justifikim të justifikueshëm. Por nëse, siç mësuam nga mediat, stadiumi nuk kishte një linjë dytësore që të furnizonte impiantin, nuk kishte një gjenerator që të furnizonte impiantin me ndriçim nëse do të kishim një avari, ky është problem kryekëput i ç’organizimit të organizuar të vetë drejtuesve të stadiumit. Se pse dhe si qysh tek kjo mungesë përgjegjësie duhet të ketë si finalizim një fajtor.

Por ajo që të lë përshtypje të hidhur në këtë derbi që tifozët mezi e presin është gjithçka që lidhet me organizimin. Është e pamundur që të kesh një biletë në duar dhe të hysh në stadium normalisht. Vetëm 30 minuta para se të fillonte derbi me dhjetra tifozë me bileta në duar qëndronin jashtë stadiumit sepse stadiumet tona (përjashto “Elbasan Arena dhe “Loro Boriçi në Shkodër) nuk ofrojnë asnjë kusht minimal për tifozët. Që të hysh në stadium me një biletë që kushton 5 mijë lekë të vjetra duhet të shtyhesh dhe të durosh edhe Policinë e cila po të dojë të mbyllë edhe dyert dhe të lë jashtë stadiumit.

Kështu edhe mbrëmë. Një polic i hipur mbi kangjellat portës bënte ligjin dhe e hapte dhe e mbyllte portën sipas dëshirës. Dhe kjo praktikë në të dyja krahët. Mos i hyj pastaj sjelljes anormale që Policia por edhe organizatorët e stadiumit kanë ndaj tifozët, ku nuk mungojnë edhe kontrollet deri në allate. Ndaj errësira që mbuloi mbrëmë derbin nuk është shkak por pasojë. Është sjellje e papërgjeshme ndaj një derbi që përpos problematikave që mund të krijojnë grupimet përkatëse të tifozëve, vazhdon të mbetet e vetmja gjë e bukur që na ka mbetur nga ana sportive. Ndaj është mirë që të mos ua hiqni derbin shkallëve të stadiumit. Në një kohë kur ka përpjekje nga tifozët për tu rikthyer në shkallët e stadiumit, dhe këtë e bën një derbi, është mirë që të mos e errësoni këtë spektakël me papërgjegjshmërinë që ju karakterizon.