‘Detyrim paraqitje’ për komisarin e Policisë që kërkoi dëshmi të rreme për aksidentin në Lungomare

Gjykata e Vlorës ka dhënë sot masën e sigurisë për Myslym Ismailajn, shefin e Hetimit në Policinë Rrugore të Vlorës, që  tentoi të ndryshojë deklaratën e shoferit që shkaktoi aksidentin me vdekje në Lungomare.

Gjykata ka vendosur detyrim paraqitjeje pranë Shërbimit të Provës.

Ismailaj u arrestua më 30 nëntor 2016 nga agjentët e Shërbimit për Çështjet e Brendshme dhe Ankesat (SHÇBA) në Vlorë. Komisar Myslym Ismailaj, 55 vjeç, kishte detyrën “Shef i Seksionit për Hetimin e Ngjarjeve të Qarkullimit Rrugor pranë Policisë së Vlorës.

Sipas njoftimit zyrtar, Ismailaj në cilësinë e Oficerit të Policisë Gjyqësore (OPGJ) ka kryer veprimet procedurale, lidhur me ngjarjen e ndodhur në datë 26 nëntor 2016, në  rrugën pranë Ujit të ftohtë, në qytetin e Vlorës, ku  humbi jetën Kristi Panajoti dhe ngeli i plagosur Petro Beja.

Nnë datë 29 nëntor 2016, rreth orës 10:00, Ismailaj ka hyrë në ambientet e dhomës së spitalit ku ndodhej i shtruar i plagosuri në aksident Petro Beja, dhe pasi ka nxjerrë familjarët nga dhoma, i ka kërkuar këtij të fundit të deklarojë se ka probleme me shikimin.

Këtë kërkesë Ismailaj e ka bërë për të devijuar hetimin, se shkak i  aksidentit ka qenë shikimi i dobët i drejtuesit të mjetit dhe jo mungesa e sinjalistikës rrugore në vendin e aksidentit, duke ushtruar presion ndaj të riut dhe tentuar të favorizojë firmën e ndërtimit të rrugës.

Pas kryerjes së veprimeve të para hetimore, materialet do t’i referohen Prokurorisë së Rrethit Gjyqësor Vlorë për veprat penale të “Shpërdorimit të detyrës”, “Veprime që pengojnë zbulimin e të vërtetës” dhe “Ushtrim i ndikimit të paligjshëm ndaj personave që ushtrojnë funksione publike”.