Diktatoruci i Serbisë dhe qesharaku i Shqipërisë, përballë pasqyrës së mediave të lira

Më në fund sulmet jo vetëm verbale që “diktatorucët” e Ballkanit Perëndimor, si “miku im Aleksandër” i Serbisë dhe “lideri botëror” Edi Rama i Shqipërisë bëjnë sistematikisht ndaj mediave që janë kritike ndaj tyre, po shndërrohen në një shqetësim përtej kufijve të këtyre vendeve

Deutsche Welle, nëpërmjet një shkrimi të ashpër, citon një raport të fundit të Human Rights Watch sipas të cilit në këto vende, mbretëron një klimë armiqësore ndaj gazetarëve kritikë që buron drejtpërdrejtë nga kryeqeveritarët.

Një nga shembujt tipik që merret në këtë shkrim është sjellja ndaj gazetarëve e mikut të “selfieve dhe batudave” të Edi Ramës, kryeministrit të Sebisë, Vuçiç.

“Në Serbi nuk ekziston më një liri e vërtetë shtypi dhe ata gazetarë që ngrenë zërin dhe kritikojnë qeverinë e kryeministrit Aleksandër Vuçiç, bëhen rregullisht objekt fushatash shpifjeje. Ata shahen si tradhtarë, armiq të shtetit dhe kundërshtarë të reformave të nevojshme”, thuhet në shkrimin në fjalë.

Vini re! Gazetarë që kritikojnë qeverinë shahen si “tradhtarë, armiq të shtetit dhe kundërshtarë të reformave”. Çfarë ju kujton kjo retorikë që përdor Aleksandri i Serbisë për mediat, që nuk i kontrollon dot? Natyrisht, Ramën e Shqipërisë.

Nëse i pari i quan llum, ky yni i quan kënetë e kazanë. Vuçiç thotë se mediat që e akuzojnë për korrupsion janë armiq të shtetit, Rama çohet çdo mëngjes me shpatën e mprehur kundër portaleve që po i prishin imazhin Shqipërisë së tij të ndritur dhe po pengojnë hapjen e negociatave me BE-në.

Nëse mediat i kërkojnë Vuçiçit që të ndryshojë qasje ndaj Kosovës dhe të ecë përpara në rrugën ndaj BE-së, ai tak fak, i quan tradhtarë të atdheut.

Kur ne i themi Ramës, që nuk i ke punët mirë me situatën e drogës dhe do penalizosh për këtë gjë vendin, ai turfullon duke na quajtur mashtrues, nxirës të realitetit dhe penguesit e vetëm të integrimit.

Aq shumë e ka trashur zullumin kryeministri i vendit më të varfër në Europë, sa që tani i ka ngelur vetëm që nga fjalët të kalojë në veprim dhe të nis reprezaljet ndaj gazetarëve dhe portaleve që po i dalin edhe në ëndërr, pasi nuk i ble dot si ka bërë me shumicën.

Në shkrimin e DW thuhet hapur, se këta lloj “diktatorucësh”  të Ballkanit (si Rama e Vuçiç)  që maksimumi në këtë betejë kundër media së lirë në mes të Europës së shekullit të 21-të, po  tregojnë jo vetëm se sa të rrezikshëm janë, por edhe sa qesharak, janë përkëdhelur dhe toleruar  deri tani nga BE-ja.

“Ka pak shpresë se gjendja mund të përmirësohet, për sa kohë që BE-ja nuk u bën të qartë vendeve të Ballkanit, se mediat e lira dhe të pavarura janë kusht për perspektivën e anëtarësimit në BE”, paralajmërohet në raport.

Kjo është situata, që si fillim ka marrë zë nga media qeveritare gjermane DË. Dhe ky është vetëm fillimi, sepse tipa “batutaxhinjsh” dhe inatçinjsh si Rama dhe Vuçiç ndoshta me vonesë, por një ditë jo vetëm kthehen në shqetësim për “mamanë” Merkel, por edhe në neveri deri në flakje pa pikë mëshire.

Apo “lideri ynë global” nuk shqetësohet për këtë ditë që po troket, se ka gati kushtin e madh për BE-në; O me mua, o me portalet e kazanit, se ndryshe ika te Putin!