Elvis Pupa: Kriteret që duhet të plotësojë një politikan për të qenë i ftuari im

Si mjeshtër i komunikimit me publikun në shfaqjet “stand-up comedy”, Elvis Pupa tani u drejtohet atyre me “M’fal për shrehjen”, programi i ri i të martave në ekran. Aktori i njohur i spektaklit “Portokalli” rikthen dyshen e batutave me Ervin Bejlerin, dhe rrëfen të preferuarit e tij për t’i ftuar në emision. Si një nënshtetas amerikan, tashmë tregon se si e priti fitoren e Donald Trump për President të SHBA-ve dhe jetën që bën si artist mes Shqipërisë dhe Amerikës.

Kthehesh nga Shtetet e Bashkuara të Amerikës për këtë projekt televiziv. Çfarë të tërheq ende në Shqipëri?

Amerika më jep atë që s’ma jep Shqipëria. Ndërsa në Shqipëri gjej familjen, miq e shokë që s’mund t’i kem në Amerikë.

I ftuari i episodit të parë të “M’fal për shprehjen” ishte Donald Trump, domethënë imituesi shqiptar i tij, Florian Binaj. Si një nënshtetas amerikan, u gëzove apo u hidhërove për fitoren e tij?

Unë nuk marr dhe nuk dua të marr vesh nga politika. E rëndësishme ishte që u plotësua vullneti i popullit, ndryshe nga ç‘ndodh në vendin tonë, ku plotësohet vullneti i atij që ka pushtet mbi kutitë.

Në këtë program rikthehesh në partneritet me Ervin Bejlerin. Ndjetë ndryshim te njëri-tjetri pas disa viteve shkëputje?

Asnjë ndryshim. Më dukej sikur ishim shkëputur një javë më parë. Instinktet artistike u aktivizuan shumë shpejt. Ne merremi vesh shumë mirë në shesh të xhirimit dhe në punën e tavolinës. Vini dhe kolegët e tjerë, si Florjan Binaj, Egla Ceno, Vilma Hodo etj. janë shumë profesionistë, ndaj është shumë komode të punosh me ta.

Dita juaj është e marta. E percepton si një ditë tersi për humor apo thjesht ditë jave për një program argëtues?

Absolutisht jo. Çdo ditë është njësoj dhe ai që dëshiron të më ndjekë, nuk pengohet nga dita e javës. Ne ritransmetojmë dhe të enjten ora 23:00 dhe të shtunën ora 20:00, kështu që është e pamundur të mos e ndjekësh, vetëm në qoftë se e ke ndarë mendjen që nuk do të na ndjekesh. (qesh)

Çfarë pi para emisionit për të qenë aq energjik në ekran?

Pi përgjegjësinë që publikut t’i jap maksimumin. Ajo ma rrit adrenalinën dhe më jep energji.

Të komunikosh me publikun është aftësi e jotja si aktor i “stand-up comedy”. Është e vështirë për një moderator kjo?

Për një aktor teatri kjo është idealja, pra të kesh publikun përballë dhe të komunikosh direkt me të. Për mua kjo është ajo që kam dashur.

Mes personazheve të njohur të politikës dhe artit, cilët do të veçoje me interesantët për programin tënd?

Ata që janë pa komplekse dhe pranojnë autoironinë. Publikut të emisionit tim i intereson të shohë anën njerëzore, e jo atë që ata kanë krijuar për show. Kush e ndjen veten rehat në këtë format, është i mirëpritur.

Cilat mund të jenë disa shprehje të palejueshme për ekran që kanë nevojë për hyrjen me “Më fal për shprehjen”?

Ato sharje, shfryrje, mallkime, nxjerrje dufi, të cilat na kalojnë në mendje dhe shumë situata e meritojnë një reagim të tillë, për etikë ne themi “M’fal për shprehjen” para se ta themi vetë shprehjen. Në këtë rast ne e mbyllim me “M’fal për shprehjen”.

E ndiqje emisionin e Ermal Mamaqit më parë, dhe si e sheh konkurrencën me të, tani që ai është në tjetër ekran?

Kam përshtypjen që të gjithë e patë që nuk ka asgjë të përbashkët. Nuk mund të krahasosh dy gjëra që s’kanë lidhje me njëra-tjetrën.

U fol se ke arritur maksimumin e audiencës, mendon se ke gjetur çelësin e sjelljes në humor të publikut që të ndjek nga shtëpia?

Nuk ka formulë të veçantë. Unë bëj atë që di të bëj më mirë. Kur ngre problematika që publiku i has përditë në jetë, atëherë ai do të jetë i interesuar dhe do të të kuptojë shumë mirë.

Jeton mes Shqipërisë dhe SHBA-ve. Ti do ta merrje vendimit e rikthimit në jetë?

Unë i jam përshtatur shumë mirë atij ritmi, dhe për më tepër më pëlqen shumë. E ku ka më mirë se të jetosh në dy vende njëkohësisht.