Harta e re elektorale/ KQZ vendos: Tiranës e Durrësit t’i shtohen deputetë

Komisioni Qendror i Zgjedhjeve votoi sot me 7 vota pro ndryshimet e mandateve të zonave zgjedhore duke bërë që në zgjedhjet e 2017-ës të ketë një hartë të re elektorale, e cila do të përcaktojë edhe rishpërndarjen e mandateve.

Në bazë të të dhënave të gjendjes civile, zbatimi i nenit 75 të Kodit Zgjedhor përmes llogaritjes së numrit të deputetëve për qark Korça, Berati dhe Kukësi do të humbasin nga një deputet, Tirana do të fitojë dy deputetë, ndërsa Durrësi një deputet. Ndarja e re elektorale përcaktohet nga lëvizjet demografike brenda territorit shqiptar si dhe rritja natyrale e popullsisë.

Berati i cili sipas rezultatit të 2013 përfaqësohet në Parlament me 8 deputetë, sipas vendimit të ri do ketë një deputet më pak. Po kështu, edhe Korçës i hiqet një mandat. Nga 12 deputetë, në Parlament do të ketë 11-te. Edhe Kukësi humbrt një mandat, nga 4 në 3 të tillë. Respektivisht Tiranës i shtohen 2 mandate, duke bërë që numri i deputetëve në 2017 të rritet nga 32 në 34. Ndërkohë që dhe Durrësi përfiton një deputet më shumë.

Në vitin 2013, një vendim i ngjashëm nga Komisioni Qendror i Zgjedhjeve parashikonte uljen e numrit të deputetëve për qarqet Berat dhe Korçë si dhe shtimin e deputetëve në Tiranë dhe Durrës. Partia Socialiste, në atë kohë në opozitë, e kundërshtoi me argumentimin se në qarkun e Kukësit, ku numri i deputetëve nuk u ul, qe shënuar një rritje e pazakontë e regjistrimeve të reja të popullsisë banuese në regjistrin civil.

Në vendimin final, KQZ-ja u nda në votim sipas përkatësisë partiake të anëtarëve dhe vendimi për ndarjen e mandateve nuk mori fuqi. Sipas Kodit Zgjedhor, vendimi për ndarjen e mandateve sipas qarqeve duhet të marrë pesë vota nga shtatë anëtarët e KQZ-së. Në mungesë të vendimit nga ana e KQZ-së, Kuvendi i Shqipërisë vendosi të lërë të pandryshuar numrin e mandateve, siç qe caktuar për zgjedhjet e vitit 2009.