Historia prekëse/ Burri del nga burgu për ti shprehur dashurinë gruas: “E dua më shumë se gjithçka”

Bashkëshortja e kishte braktisur pasi u burgos, dhe prej gjashtë muajsh nuk shihte vajzën 4-vjeçare.

Emanuela vendosi të largohej nga shtëpia ku kishte jetuar me bashkëshortin, Arturin, pasi ai u burgos. Prej gjashtë muajsh Arturi, i mbyllur në burg, nuk e shikon më të bijën 4-vjeçare.

Ai iu drejtua “Shihemi në gjyq” për t’i kërkuar bashkëshortes të kthehet në shtëpinë e tyre me prindërit e tij, të cilët kanë mbetur të habitur nga largimi i Emanuelës, e cila në fillim pas arrestimit dhe burgosjes së bashkëshortit për lëndë narkotike dhe armëmbajtje pa leje, kishte treguar shumë mbështetje për bashkëshortin dhe familjen e tij.

Me leje të veçantë nga ministri i drejtësisë, Eni Çobani arriti të nxirrte Artur Velan nga burgu për t’i shprehur publikisht dashurinë gruas të tij.

“E dua më shumë se gjithçka në botë! Është shumë e veçantë për mua!”, kështu ia shprehu dashurinë Arturi gruas së tij, e cila me shumë këmbëngulje refuzoi të kthehej. E lodhur nga pritja, Emanuela tha se 13 vitet që duhet të vuante Arturi në burg i dukeshin një kohë tepër e gjatë. Ajo tha se të bijën nuk e kishte çuar të shihte të atin në burg sepse ajo trembej.

“Ti vërtet mendon se do të dalësh nga burgu?!”, këmbëngulte Emanuela ndërsa i shoqi i përsëriste se ishte aty për t’I treguar se është i pafajshëm, “Ti më ke shkatërruar jetën! Nuk kthehem!” Por Arturi nga ana e tij këmbënguli se duhet t’i besonte atij, bashkëshortit të vet, dhe t’i lejonte të shihte vajzën për të cilën e kishte marrë malli.

“Unë jam Arturi që ke njohur ti, jo ai që thotë prokuroria!”

Pas lutjesh nga ana e Arturit, babait dhe nënës së tij si edhe ndërhyrjeve të ndërmjetëses Eni Çobani, Emanuela uli kokën me ngashërima dhe pranoi se thellë, kishte besim tek ai. Ishin rrethanat ato që e kishin detyruar të merrte këtë vendim.

“E di që Arturi nuk e ka bërë këtë. Unë do të kthehem.”- tha ajo ndërsa qante.

Në fund, i lumtur që më në fund po ndjente përsëri mbështetjen e gruas dhe se do të shihte përsëri të bijën, Arturi përqafoi dhe puthi Emanuelën./anabel