Hodhi gruan nga dritarja/ Dëshmia: E mbante me kokë poshtë, i bërtiste “fol”

FIER– Vrasja në mënyrë të tmerrshme e 43-­vjeçares Liljana Ruko në Fier erdhi pak ditë, pasi ajo kishte kërkuar divorcin nga bashkëshorti i saj.

Fillimisht, gruaja, nënë e dy fëmijëve të mitur, e kishte paditur në polici për dhunë, për të kërkuar urdhër mbrojtje, por nuk kishte pranuar që ai të arrestohej, duke thënë se do të kërkonte më tej ndarjen në gjykatë, raporton “Panorama”.

Sipas denoncimit të gruas, i shoqi ishte i dhunshëm dhe shumë xheloz pa arsye. Mesditën e djeshme ajo u përcoll për në banesën e fundit nga familja e saj, të cilët nuk pranuan që në mort ajo të mbante mbiemrin e burrit vrasës, por të sajin, Liljana Zhezha.

Edhe pse derës së shtëpisë së çiftit i është vënë kyçi dhe qepenat janë mbyllur, fqinjët e tyre vijojnë të lëvizin përpara pallatit duke rrëfyer herë pas herë detaje të dhimbshme që kanë shoqëruar fundin e gruas, nënë e dy fëmijëve të mitur.

Sipas fqinjëve të saj, burri ka dalë në dritare bashkë me të shoqen duke i bërtitur fort, por po ashtu dëgjoheshin edhe të bërtiturat e gruas për ndihmë.

fier-vret-gruan.-1jpg

Fqinjët thonë se kur kanë dëgjuar të bërtasë gruaja kanë dalë të gjithë për të gjetur mundësi për ndihmë, por ka qenë e pamundur.

“Ne e pamë të gjithë sa ishim këtu afër. Ata bënë sherr në dritare, sepse ai donte ta hidhte dhe ajo kundërshtonte, pasi luftuan në këtë mënyrë ai arriti ta nxjerrë, duke e mbajtur nga të dyja këmbët me kokën poshtë.

Ashtu qëndroi gjatë e vetëm se i thoshte: “Fol!”, ndërsa ajo lutej që mos ta lëshonte. Ishte e tmerrshme. Skenë që as në filma s’e kishim parë. Ajo bërtiste që ai ta ngjiste lart, ai pa një herë rreth e rrotull dhe e hodhi sikur ta kishte thes me mbeturina. Gjatë rënies nga lartësia, ajo ulëriu fort dhe dikush që ishte më afër shkoi u afrua se mos e priste, po ku kishte shpresa… Nuk bëhej fjalë fare. Ka qenë ngjarje e frikshme. S’po na zë gjumi”, ka thënë Athina M. nga lagjja “Kryengritja e Fierit”.

Po ashtu, edhe banorë të tjerë të lagjes kanë thënë se burri ishte kthyer në një njeri shumë agresiv dhe në pamje nga largësia dukej si i frikshëm. Madje, njëri prej banorëve ka thënë se vetëm 3 orë më parë se të ndodhte krimi, burri kishte pirë një kafe në lagje dhe dukej shumë i shqetësuar.

(BalkanWeb)