“Isha unë ai me biçikletë, por s’e vrava gruan”, dëshmia e shqiptarit në Polici

Pranoi se ishte ai personi mbi biçikletë që kishin filmuar kamerat e sigurisë pranë shtëpisë së viktimës, në ditën dhe kohën e supozuar të vrasjes, por mohoi çdo keqbërje, duke pretenduar se kishte qenë atje për arsye të tjera dhe jo për të vrarë nënën e ish-pronarit për hakmarrje.

Kështu është mbrojtur para hetuesve Ogert Laska, shqiptari 29 vjeçar i ndaluar nga policia për vrasjen e 71 vjeçares Rosa Maria Radicci.

Gjatë marrjes në pyetje, ai ka thënë para hetuesve se nuk e ka kryer ai krimin.

Sakaq, akuza mbi të rëndon për vrasje për hakmarrje ndaj djalit të viktimës, i cili e kishte pushuar nga puna, në picerinë ku shqiptari punonte.

Ka një leje të vlefshme për të jetuar në Itali, është i martuar dhe ka dy fëmijë, por është përshkruar si një person gjaknxehtë.

Ai u kap nga policia në portin e Barit, teksa kthehej nga Shqipëria ku kishte shkuar më 17 nëntor, katër ditë pas krimit vitin e kaluar, shkruajnë mediat italiane.

Hetuesit supozojnë se ai u kthye në Itali për të marrë gruan e tij dhe fëmijët në Shqipëri.