Itali, pjesëmarrje e ulët në votime, do të triumfojë apo do të dorëhiqet Renzi?

Në Itali vazhdojnë votimet në referendumin për të ndryshuar Kushtetutën, që i heq kompetenca Dhomës së Lartë të Senatit dhe i jep më shumë Qeverisë.

Anketuesit thonë se një pjesëmarrje e ulët në votime mund të favorizojë Kryeministrin Matteo Renzi, megjithatë kjo mbetet për t’u parë. Ka qenë pikërisht Renzi që ka kërkuar këto ndryshime kushtetuese, duke premtuar se do të japë dorëheqjen nëse humbet në referendum.

Këtë propozim të Kryeministrit italian e kundërshtojnë fort votuesit e rinj dhe banorët e zonave të varfra të jugut të Italisë. Referendumi në Itali për ndryshimet kushtetuese vjen në një moment delikat pas daljes së Britanisë nga BE dhe fitores së Donald Trump në zgjedhjet presidenciale amerikane. Një humbje e mundshme e Renzit në referendumin e sotëm do të shkaktojë një valë shoku në të gjithë Evropën.