Ja me kë do të punojë Ilir Meta në zgjedhje

Ditën e nesërme mbahet Konventa e Përgjithshme e LSI-së, ku do të votohet për një sërë ndryshimesh në postet drejtuese të partisë.

Burime bejne te ditura se do ketë ndryshime edhe në poste kryesore. Nesër pritet që Endrit Braimllari të zgjidhet Sekretar i Përgjithshëm i LSI-së.

Po kështu, Petrit Vasili do të zgjidhet zv/Kryetar, ndërsa Kejdi Mehmetaj dhe Luan Rama, që të dy nënkryetarë.

Gjithashtu, do të votohet për Komitetin Drejtues Kombëtar. Konventa nis ditën e nesërme në orën 10:30, ndërsa anëtarët mund të shpallin kandidaturat deri në orën 10:00.

Gjatë mbledhjes me dyer të mbyllura të Kryesisë së LSI-së, mësohet se Ilir Meta ka bërë të ditur do t’i propozojë Konventës Kombëtare Zgjedhore katër kandidatura për këto pozicione: për Kryetar të LSI-së, Petrit Vasili, Sekretar i Përgjithshëm, Endrit Braimllari dhe si N/Kryetarë të LSI-së, Luan Rama dhe znj. Kejdi Mehmetaj.

Për të pasur sa më shumë kolegjialitet në zgjedhjen e strukturave drejtuese të LSI-së, për herë të parë këto poste do të zgjidhen nga Konventa Kombëtare Zgjedhore.

Gjithashtu, Meta ka ftuar çdo anëtar të Komitetit Drejtues Kombëtar dhe deputetë, të cilët dëshirojnë të kandidojnë në këto poste, të paraqesin kërkesë me shkrim deri nesër (e shtunë) para orës 10:00 pranë Sekretarit të Përgjithshëm, Luan Rama.

Një tjetër risi do të jetë miratimi në Statutin e LSI-së i krijimit të Kryesisë Ekzekutive të LSI-së, ku përveç Kryetarit të LSI-së, Sekretarit të Përgjithshëm,

Kryetarit dhe dy N/Kryetarëve, do të jenë pjesë edhe Kryetari i LRI-së dhe Kryetari i LGI-së. Votimi në Konventën Kombëtare Zgjedhore do të bëhet në mënyrë të fshehtë dhe me sistem elektronik.