Ja se ç’u premtojnë tetovarëve partitë në këto zgjedhje

Partitë politike pjesëmarrëse në zgjedhjet e 11 dhjetorit kanë vazhduar me fushatën elektorale nëpër vendbanime të ndryshme të Maqedonisë duke dhënë premtime të shumta për zgjidhjen e problemeve me të cilat përballen qytetarët.

Premtime të tilla po jepen edhe në Tetovë ku pjesa dërrmuese e banorëve janë shqiptarë. Tetova me rrethinë është pjesë e njësisë së gjashtë zgjedhore e cila në votimet e 11 dhjetori do të zgjedh 20 deputetë të përbërjes së re parlamentare, shkruan Radio Evropa e Lirë.

Partitë në këtë rajon me rreth 100 mijë banorë, premtojnë infrastrukturë moderne, investime, punësime, shkolla, spitale, objekte kulturore, zhvillim të turizmit, pastërti dhe shumë projekte tjera.

Por, sa u besojnë qytetarët premtimeve të tilla?

Ata në prononcimet e tyre për Radion Evropa e Lirë, thonë se janë të dëshpëruar me gjendjen aktuale dhe nga premtimet e shumta të partive që asnjëherë nuk janë realizuar.

Problemi kryesor me të cilin po përballen tetovarët është ndotja e madhe e ajrit. Sipas disa statistikave, Tetova ka rezultuar të jetë edhe qyteti më i ndotur në botë.

“Kjo është një bombë atomike sikurse në Hiroshima që ka pëlcitur edhe këtu tek ne çdo ditë njerëzit sëmurën me kancer e sëmundje tjera. Kjo është tragjedia më e madhe e Tetovës. Fajet i ka faktori ynë politik që është në pushtet. Nuk i kryen punët ashtu siç duhet. Nuk i ka kryer dhe as që do t’i kryej”, thotë Ilmi Selmani, banor i Tetovës.

Një tjetër banor, Sefedin Bajrami, pensionist, thotë se në Tetovë mungon pastërtia andaj, sipas tij, kujdes i veçantë duhet kushtuar rregullimit të qytetit, si qendër më e madhe e shqiptarëve në Maqedoni.

“Është gërdi edhe të hysh në qytetin e Tetovës, por edhe të ecësh nëpër Tetovë. Është gërdi, gjithandej, letra dhe gjëra të panevojshme. Si qyteti kryesor i shqiptarëve duhet të jetë ndryshe, të ketë pamjet tjerë, por nuk ka asgjë”, thotë Bajrami.

Arben Saiti, student, thotë se premtimet e partive janë të mëdha edhe atë gjithmonë para cikleve zgjedhore duke premtuar gjithçka, por premtimet e tilla, siç thotë ai, zgjasin deri në ditën e zgjedhjeve.

“Ne jemi mësuar me premtime zgjedhore, pas çdo cikli zgjedhor. Besoni, zhgënjimet janë dyfish më të mëdha se sa ato paraprake. Do të kisha dashur që pas disa cikleve zgjedhore, vetëdija e popullatës që i zgjedh këto përfaqësues, të rritet dhe të jetë në nivelin e duhur duke i dënuar njëherë e përgjithmonë të gjithë ata që nuk e bëjnë punën e vet. Jo të na bëjnë shërbime neve si qytetarë, ata nuk na bëjnë shërbime neve, ata e bëjnë punën e vet. Për këtë edhe votohen”, thotë Saiti.

Ngjashëm vlerëson edhe Bialall Ramadani, i papunë.

“Premtimet janë të mëdha çdoherë e posaçërisht para zgjedhjeve. Mirëpo, qytetarët nuk i ndjejnë ndryshimet në kualitetin e jetës së tyre. Edhe këtë herë nuk besoj se mund të ketë ndryshime”, thotë Ramadani.

Tetovarët thonë se po ndjekim me vëmendje edhe premtimet e partive për të drejtat kolektive të shqiptarëve, në veçanti ato për zyrtarizimin e gjuhës shqipe në nivel qendror.

“Pas disa viteve në pushtet të premtosh përsëri për gjuhë dhe për flamur. Këto janë vetëm përralla për natën e mirë, përralla për gjumë të ëmbël. Ky është një nënçmim i inteligjencës kolektive të shqiptarëve në Maqedoni, është me të vërtet non sens”,thotë Arben Saiti./REL/