Johnson mbështet Trump-in: Më shumë para për mbrojtjen e anëtarëve të NATO-s

Londër – Britania e Madhe do të mbështesë presidentin e sapozgjedhur të Shteteve të Bashkuara, Donald Trump, në përpjekje për të detyruar anëtaret e NATO-s për të siguruar më shumë fonde për mbrojtje.
Këtë e ka thënë ministri britanik i Punëve të Jashtme, Boris Johnson.

Johnson, në një fjalim në Institutin Mbretëror të Çështjeve Ndërkombëtare, tha se Britania mbetet e angazhuar për konceptin e mbrojtjes kolektive të NATO-s, “aleancës më të qëndrueshme dhe më të suksesshme në historinë e mbrojtjes”, e cila ofron garanci të sigurisë, raporton BBC.

“Në kuptim të dhënies së kësaj garancie, Trump ka të drejtë. Nuk mund të justifikohet që një aleat i NATO-s, Amerika, përbën rreth 70 për qind të kostos së aleancës për mbrojtje, ndërsa 27 vendet e tjera ndajnë mes tyre vetëm 30 për qind”, tha ministri britanik .

Trump, gjatë fushatës zgjedhore, ka kritikuar NATO-n, duke thënë se Shtetet e Bashkuara do të shqyrtojnë nëse do të ndihmojnë ndonjë anëtare në rast të sulmit, nëse nuk ka paguar “ndarje të drejtë”.

Mbretëria e Bashkuar, e cila për mbrojtjen e saj shpenzon dy për qind të bruto prodhimit të brendshëm, poashtu u ka bërë thirrje vendeve të tjera për të rritur kontributin e tyre.

“Britania e Madhe duhet të dyfishojë vendosmërinë e saj për të mbrojtur dhe për të ruajtur rendin ndërkombëtar të bazuar në rregulla dhe të parandalojë kthimin e ish sistemit brutal në të cilin të fortët janë të lirë për të shkatërruar të dobëtit”, tha Johnson.

Ministri i Jashtëm britanik po ashtu ka thënë se Britania e Madhe nuk do të përpiqet që të ndalojë BE-në për të krijuar një politikë të përbashkët të mbrojtjes.

Johnson shtoi se mbrojtja e fortë nuk përjashton negociatat por beson se presioni mund të ndikojë tek Rusia për shkak të pushtimit të Krimesë, përzierjes në luftën në lindje të Ukrainës dhe bombardimet në Siri.

“Nuk mund të normalizohen marrëdhëniet me Rusinë apo të kthehemi në të vjetrën”, ka thënë Johnson, duke shtuar se Rusia mund të fitojë mbështetje nga bashkësia ndërkombëtare, nëse pezullon bombardimet në Siri dhe të respekton Marrëveshjen e Minsk-ut.

Johnson tha se duhet të pranohet që bota në disa aspekte nuk është në gjendjen më të mirë.

“Ne kemi kultin e të fuqishmit, kemi demokracinë në tërheqje, destabilitet në të gjithë Lindjen e Mesme, nga Iraku në Siri dhe Libi. Cila është përgjigja e Britanisë, që ajo të përkulet apo të vë jastëkun në kokë? Absolutisht jo”, tha Johnson.