Krimi makabër/ Nëna kishte shkuar të merrte dy fëmijët, por…

Detaje të reja kanë dalë në dritë sa i përket ngjarjes makabër që ndodhi në qytetin e Korçës ku dy djem, 6 dhe 4 vjeç u mbytën me tel nga babai i tyre, i cili më tej i dha fund edhe jetës së tij në të njëjtën mënyrë.
Gjyshi i tyre ishte i pari që u përball me makabritetin. Trupat e pajetë ndodheshin në dhomën e gjumit në katin e dytë të shtëpisë, dy të miturit dhe djali i tij.

Në mëngjes plaku gjeti një letër në katin e parë në të cilën shkruhej: “Ngjitu lart”. Mesazhi ishte posaçërisht për babanë e Naum Toshit, i cili si çdo mëngjes shkonte në shtëpinë e të birit, për t’u kujdesur për të dhe dy të vegjlit.

Dy fëmijët ishin mbytur me tel në qafë, kurse babai i tyre ishte varur, gjithashtu me tel. Viktimat ishin në të njëjtën dhomë, dhe policia akuzoi për krimin e trefishtë Naum Toshin. Nga hetimet e deritanishme del që 41- vjeçari Naum Toshi ishte rënduar psikologjikisht, pas largimit nga banesa të bashkëshortes së tij Marsela Toshi.

Edhe familjarët e tij, konfirmojnë mosmarrëveshjet e vazhdueshme të çiftit, të cilat sollën largimin e gruas nga shtëpia dhe më pas krimin makabër të burrit të braktisur.

Çifti ishte në konflikt edhe kur ndodheshin në Greqi. Me një grua 15 vjet më të re, Toshi vendos të lërë emigracionin dhe të kthehet në Korçë, në shtëpinë e tij në lagjen 4. Marrëdhënia midis tyre nuk u normalizua, por u përkeqësua. Naum Toshi nuk e lejonte atë të punonte si kameriere në një disko të qytetit.

Sipas familjarëve gruaja ishte larguar nga shtëpia në mes të muajit nëntor, drejt Greqisë, duke e braktisur të shoqin dhe dy djemtë e mitur, ku më i madhi ishte frut i martesës së parë të saj. TvKlan.al shkruan se ka dëshmi që ajo u kthye dhe dy orë para se të ndodhte ngjarja tentoi te merrte fëmijët dhe të largohej bashkë me ta në Greqi.

Por e refuzuar nga i shoqi ajo vazhdoi e vetme në shtetin fqinj, kurse 41-vjeçari mori vendim fatal, vrau dy fëmijët dhe veten.