Ky i vdekur i tepërt që mund të ndezë Kosovën!

Kështu e kanë titulluar reportazhin e botuar gazetat e mirënjohura “Le Temps” në Zvicër dhe “La libre” në Belgjikë, dedikuar rastit të vdekjes së aktivistit të Lëvizjes Vetëvendosje, Astrit Dehari.

Artikulli e konsideron një vdekje misterioze rastin e Deharit, që sipas tyre po kristalizon zemërimin kundër qeverisë dhe Presidentit Hashim Thaçi.

Reportazhi nënvizon faktin sesi autoritetet shtetërore konkluduan shpejt në përfundimin se Astrit Dehari kishte bërë vetëvrasje duke konsumuar medikamente, dhe tregojnë se ky version u braktis po aq shpejt, duke treguar më tej edhe versionin se Astriti vdiq nga asfiksia e provokuar nga gëlltitja e një shisheje të plastikës.

“Para së gjithash, ne kërkojmë dorëheqjen e ministrave të brendshëm dhe të drejtësisë, e pastaj krijimin e një komisioni të pavarur hetues”, citohet të ketë thënë avokati Gashi, i cili ka treguar për ta se pse nuk e beson versionin e autoriteteve, atë të vetëvrasjes.

“Të rritur në një familje ku nuk luhet me parimet, të dy djemtë e familjes i janë bashkëngjitur në mënyrë të natyrshme Lëvizjes Vetëvendosje!”, thuhet ndër të tjera në këtë artikull.

Shkrimi analizon dhe familjen e Astrit Deharit, konkretisht babain e tij Avni Deharit, ku flitet për aktivitetin e tij në Zvicër, pjesmarrjen në Lëvizjen Popullore të Kosovës (LPK), dhe për rikthimin e tij dhe familjes në Kosovë gjatë vitit 2001, kur Astriti ishte vetëm 12 vjeç.

Po ashtu, përmendet edhe rrëfimi i Deharit për pushtetarët e sotëm, ku thotë se i kishte shokë, porse ka ndërprerë lidhjet me ta kur ata kanë zgjedhur korrupsionin. Po kështu tregohet dhe refuzimi i familjes Dehari për telegramin e ngushëllimit nga Hashim Thaçi ditën e varrimit.
“Regjimi e akuzon djalin tim për terrorizëm e pastaj presidenti i shtetit dërgon telegram ngushëllimi…Kujt? Një terroristit të supozuar ? Kjo nuk ka asnjë logjikë”, citohen fjalët e Avni Deharit në këtë reportazh.

Kur flitet për jehonën që ka pasur rasti, artikulli flet për kërkesën e zyrtarëve perëndimore dhe Lëvizjes vetëvendosje për hetim të pavarur, duke cituar Visar Ymerin teksa flet për provokimet që po përpiqet t’i bëjë qeveria.

“Jemi mësuar me korrupsionin e qeveritarëve tanë, por nëse fillojnë t’i vrasin fëmijët tanë duke folur për demokraci, kjo është e tepërt. Nuk do të lejojmë që Kosova të shndërrohet në një diktaturë si në Kilin e Pinoçetit” janë fjalët e një arsimtareje që kishte ardhur për t’i shprehur ngushëllime familjes, me të cilat përfundon dhe reportazhi.