LSI kundër PS për ligjin për akcizën e gazit

Kreu i grupit parlamentar të Lëvizjes Socialiste për Integrim, Petrit Vasili, kërkon që të mos rritet çmimi i gazit që përdoret për funizimin e automjeteve.
Në projektligjin për ndryshime në ligjin për “Akcizat”, është parashikuar rritja e çmimit aktual me 13 leke për litër, ose ndryshe -më shumë se 25 % .

Në një letër drejtuar kreut të Kuvendit Ilir Meta, një ditë para seancës plenare ku do të diskutohet buxheti i vitit të ardhshëm, Vasili kërkon që të hiqet neni 4, që parashikon rritjen e çmimit të gazit.

Deputeti analizon edhe arsyet që e shtyjnë drejt këtij amendamenti. Vasili thotë se së fundi janë shtuar makinat që përdorin gaz, si për familjet ashtu edhe për bizneset, të cilët kanë paguar para për të vendosur impiantin.

“Si propozues i këtij amendamenti gjykoj që kjo është një kosto që rëndon buxhetin e familjarëve, pasi rritja është shumë e lartë krahasuar kjo me çmimin aktual të gazit që përdoret për furnizimin e automjeteve të qytetarëve. Në kushtet kur qytetarët përballen me mjaft vështirësi ekonomike është jo i arsyeshëm rëndimi i tyre me vendosjen e kësaj akcize. Akoma më i domosdoshëm bëhet mosmiratimi i saj edhe në kushtet e luhatjes së vazhdueshme të cimeve të karburanteve të cilat përballen qytetarët me shpenzime shtesë që rëndojnë shumë buxhetin familjar”, thotë Vasili në letrën dërguar Metës.